JINHA

RIHA - Malbata Muslim a 8 zarokên wan hene û ji ber êrîşên çeteyên DAIŞ'ê neçar man malên xwe terk bikin, li bereqeyeke nêzî gundê goristina gundê Miseynterê  têkoşînê jiyanê didin, gotin ku ew ê sînorê Kobanê terk nekin û vegerin malên xwe.

Kobaniyên ji  ber  êrîşên çeteyên DAIŞ'ê neçar man koç bikin, di bin şert û mercên zehmet de têkoşîna jiyanê didin û li benda roja azadiya Kobanê ne. Malbata Muslim a 8 zarokên wan hene, ji ber êrîşên çeteyên DAIŞ'ê hatin gundê Miseynter a Pirsûsê.

Malbata Abdullah Muslim li bereqeyeke nêzî goristina gund bi cih bûn.  Li bereqeyê elektîrîk nîne û malbat bi derfetên kêm di bereqeyê cihekî wek mutbexê çêkirin. Abdullah Muslim da zanîn ku di demên şiliyê de av ji ser xênî diherike hundir û heta vegera Kobanê ew ê li vir bimînin.

‘Yekane armanca me azadıya kobanê ye’

Abdullah Muslim diyar kir ku ji bilî şêniyên gundê Miseynterê û Komeleya Piştevaniya Rojava ji kesekî din alîkarî negirtine û ew zehmetiya sotemenî û xurekê dikişînin.  Abdullah da zanîn ku li gel hemû zor û zehmetiyan dixwazin, demildest vegerin Kobanê û got: "Em tiştekî ji kesî naxwazin. Înşalah wê YPG di demek kurt de Kobanê rizgar bike û em jî vegerin malên xwe. Ji bilî vê em tiştekî naxwazin."

(rt/zt)