JINHA 

AMED - Îsal  dê rojeva 8’ê Adarê  Roja  Jinên Kedkar ên Cîhanê  jinên YPJ ên ku li Kobanê têkoşînê dimeşînin be. Jinên KESK'ê yên ku amedakariyên  8 'ê Adarê li Amedê dikin dê di 1'ê Adarê de li Bircabizinan ji bo jinên ku jiyana xwe ji dest dane fenerên hêviyê bifirînin.

Jinên Platforma Şaxa KESK'ê a Amedê  amedakariyên 8'ê Adarê Roja Jinên Kedkarên Cîhanê  didomin. Jinên KESK'ê bi diruşma  KJA yê ya "Emê bi jinên li Kobanê têkoşînê dide xwe birêxistin bikin û jiyanê azad bikin" biryara xebatên hevbeş girtin. Berdevka  demî ya jinên KESK'ê  Saniye Seykan diyar kir ku îsal jinên li Kobanê têkoşînê didin dê mohra xwe li çalakiyên 8'ê Adarê bixin. Saniye  bibîrxist ku starta  Meşa Jinên Cîhanê li Kurdîstanê hatiye dayîn û wiha got: "Em li kargehên xwe ji bo Meşa ku starta wê li Nisêbînê hatiye dayîn banga tevlîbûnê dikin. Bi pankartên ku emê bi kargehan ve daliqînin, bi belavokan û bi belavokên destan em xebatên tevlîbûna gel û tevlîbûna jinên kedkar yên KESK'ê dimeşînin."

Ji bo jinên kedkar diyariya 8'ê Adarê

Saniye anî ziman ku ew bi Kongra Jinên Azad (KJA) yê re xebatên hevbeş dimeşînin û li gel wê bernameyê çalakiyan jî hene. Her wiha ji bo 8’ê Adarê Roja Jinên Kedkarên Cîhanê  quflik dane çêkirin, Saniye da zanîn ku li hemû navendan meşa meşaleyî dê  hemdem bê li darxistin û wiha dawî li axaftina xwe anî, "Ez wisa bawer dikim ku hemû jin hewceye tevde bimeşin û em ji vê hêzê bigrin. Em nabin koleyê AKP'ê  û sermaye. Ji ber wê em xebatên pêwîst dimeşînin.”

Bernameya Jinên Platforma Şaxa  KESK’ê ya Amedê wiha ye;

"*Di 1'ê Adarê de li Bircabizinan dayîna starta 8'ê Adarê, Forum û firîna fenerê Hêviyê,

*Bi pêşengiya Egitim -Senê dê di 6'ê Adarê de li Navenda Çanda Cegerxwîn  şanoya "Bila jintî bi me bimîne" bê pêşandan.

*Di 6'ê Adarê de li hemû navendan hemdem meşa meşaleyî ya KESK'ê dê bê lidaxistin."

(ks/zt)