Jinên Qamişlo: Çi dibe bila bibe em xaka xwe terk nakin
11:34
JINHA
QAMIŞLO – Jinan têkildarî komkujiya ku çeteyên DAIŞ’ê li bajarê Qamişlo pêk aniye de axivîn û gotin çi dibe bila bibe wê xaka xwe terk nekin û dest ji berxwedanê bernedin.
Li bajarê Qamişlo li taxa Xerbî ji aliyê çeteyê DAIŞ’ê ve di 27’ê Tîrmehê de êrîşa wesayîta bombebarkirî pêk hat û di komkujiyê de 52 kesî jiyana xwe ji dest da. Her wiha hejmara birîndaran her diçe zêde dibe û xebatên enkazê jî berdewam dikin. duh 12 kes hatin definkirin. Ji bo Stêr Ebdulfesîh Osman, Dara Şemsî Hesen, Heysem El-Elî, Ebdulselam Fuat Yusuf, Salih El-Xelef, Diyar Xalid Şêxmus, Ela Haci Fatimê, Feyruz Keleş, Leyla Tahir, Dawid Hisên Mehemed, Raman Mişel û Cewher Mehemed Îsmaîl ku jiyana xwe ji dest dan li ber mala gel a Enteriye bi sedan kes hatin cem hev û cenaze girtin. Piştre bi cenaze bi konvoyek dirêj birin şehîdgehê. Jinên li taxa Xerbî dijîn diyar kirin ku çi dibe bila bibe wê xaka xwe terk nekin û dest jê bernedin.
'Kurdan serî netewand wê netewînin’
Mervet Mistefa Kîlo ya ji bi eslê xwe ji Dirbêsiyê ye diyar kir ku komkujiya hatiye kirin bi armanca koçberkirinê kirine û got ew xaka xwe terk nakin. Mervetê got: “Vê komkujiyê dilê me hemûyan şewitand. Em ji malbatên kesên jiyana xwe ji dest dane re sersaxiyê ji birîndaran re şifayê dixwazin. Emê qezenc bikin. Gelê Kurd serî natewîne. Serkeftin ya me ye.”
'Em wek jinên Kurd xaka xwe terk nakin’
Etîhat Yunis got di êrîşê de xaniyê birayê wê xera bûye û got alîkarî dane wî. Etîhatê wiha berdewam kir: “Ez bang li çeteyên DAIŞ’ê dikim. Em serî li dijî wan natewînin. Gelek birîndar û şehîdên me hene. Lê çi dikin bila bikin em dest ji xaka xwe bernadin. Em wek jinên Kurd ji xaka xwe dernakevin. Bila dewleta tirk jî bizane, DAIŞ jî bizane. Emê li vir bin û jiyana xwe bidomînin.”
'Em dest ji welatê xwe bernadin’
Semîra Bektaş jî got ew li dijî zilmê serî natewînin û got wê teqez bi ser bikevin. Semîrayê wiha got: “Xwedê rehma xwe li şehîdên me bike. em li dijî zilmê serî natewînin. Em bawer dikin ku emê bi vê baweriyê qezenc bikin. Em xaka xwe terk nakin. Çi dikin bila bikin. Emê bi serkevin.”
(gb/hu)