JINHA

AMED – Çalakiya 50 Berxwedêrên Greva Birçîbûnê di roja 5’emîn de rastî serdanên girseyî tê û her ku diçe sazî û welatî eleqe nîşan didin.

Çalakiya greva birçîbûnê ya bêdem û dorveger a bi pêşengiya KCD, HDK, KJA, DBP û HDP’ê ku 50 berxwedêran dabû destpêkirin di roja 5’emîn de bi dilgeşiyek mezin didome. Berxwedêr ên ku saet di 10.00’an de li cihê çalakiyê dest bi rojê dikin, rojevê jî ji rojnameyên Azadiya Welat û Ozgrulukçu Demokasî dixwînin û hin berxwedêr jî di rojnivîsên xwe di nivîsînin. Pêşmalkên li ser çalakvanan ku di rojên ewil de tenê bi posterê Ocalan li ser bû niha jî nivîsên “Tecrît sucek mirovahiyê ye”, “Azadiya Ocalan azadiya me ye”, “Tenduristiya Ocalan tenduristiya me ye” û “Ocalan hebûna me ye” hatin nivîsandin.

Li aliyê din her ku diçe çalakiya berxwedêran rastî eleqeyek mezin tê û bi sedan welatî û rêveberên saziyan berxwedêran ziyaret dikin. Hevserokê KCD’ê Hatîp Dîcle û heyeta pê re, xebatkarên Navenda Çanda Mizgîn a Êlihê, şanoger, Pîr û Dayikên Ocaxên Zarokên Dêrsîmê û bi sedan welatî berxwedêran ziyaret kirin û li rewşa wan pirs kirin û piştgiriya xwe ji bo wan anîn ziman.

‘Em aşîtî û azadiyê dixwazin’

Di serdanê de ewil nûnerê Pîr û Dayikên Ocaxên Zarokên Dêrsîmê Hasan Genç axivî û diyar kir ku pêwîste her civak li gorî baweriya bijîn û got ku ji bo yekîtî û tifaqê vê çalakiyê destek dikin. Hasan bal kişand ser hemû qetliyamên li Kurdistanê pêk hatine û pêk tên û got ku ew şer naxwazin ew aşitiyek mayînde û jiyanek azad dixwazin.

Stran hatin vegotin

Dayika bi navê Adalet Çay a ji Rihayê hat di serdanê de strana ku li ser berxwedanên bajarên Bakûrê Kurdistan çêkiriye vegot.

Hûnermendên Navenda Çanda Mizgîn a Êlihê jî ji bo berxwedêran bi sitrînê strana piştgiriya xwe dan nîşandan.

(kom/zt)