Ronîda Hacî /JINHA

TIL TEMIR- Li bajarê Til Temirê jinên ku amedekariya Cejna Qurbanê dikin gotin: "Hêviya me ew ku ev cejin bibe wesîleyê aştî û azadiyê. Êdî em şer û rijandina xwînê naxwazin."

Bi wesîleyê Cejna Qurbanê welatî li rojavayê Kurdistanê dest bi amedekariyê xwe kirin. Jinên ku li sûka bajarê Til Temirê amedekariya cejnê dikin hêviyên xwe di derbarê cejnê de anîn ziman. Jinan diyar kirin ku, cejin ji dîrokê ve roja li hevhatinê ye û gotin ku, ew hêvî dikin cejin bi xwere aştî û azadiyek mayînde bîne.

'Em aştî û azadiyê dixwazin'

Semiye Şêxmûs Mihemed Cejna Qurbanê li tevahî gelan pîroz kir û wiha got: "Bi hatina cejna Qurbanê re em hêviyên xwe yên ji bo aştî û azadiyê dubare dikin. Di serî de ez vê cejnê li şervanên YPG-YPJ'ê, hêzên Asayişa Gel û Rêber Apo pîroz dikim. Me amedekariya cejnê bidawî kir. Ez hêvîdarim ev cejn bi xweşî derbas bibe û bûyereke nexweş neqewime."

'Em dev ji doza xwe ya azadiyê bernadin'

Xedîce Til Temir bi wesîleyê cejnê tevahî kesên jiyana xwe di encama şer de jiyana xwe ji dest dane bi bîr anî û wiha axivî: "Em wek gelê Rojava di cejnê de jî rastê êrîşan tên, lê em ê dest ji axa xwe û doza xwe ya azadiyê bernedin. Bi hêviya rojên xweş û aram em cenjê pîroz dikin."

'Hêviyê her welatiyek vê axê aramiye'

Muna Hemad jî bi lêv kir ku, ew ji bo amedekariya zarokên xwe daketiye sûkê û wiha axivî: "Ez niha daketime sûkê cil ji zarokên xwe re distînim. Daxwaza me ji vê cejnê ew e ku gel bi aramî bijî. Ev ne tenê daxwaza min e, daxwaza her welatiyeke vê axê ye. Ji ber hersal bûyerên nexweş çêdibin, hêvî dikim vêcarê wiha nebe."

Lîloz Paşo ya 13 salî jî Cejna Qurbanê li hevalên xwe pîroz kir û wiha got: "Em ê cejna xwe li gund pîroz bikin, ez û hevalên xwe li gund bigerin cejna gel li wan pîroz bikin û şekiran kom bikin. Ez ji cejnan hez dikim."

Ferha Silêman jî ya ku li sûkê ji bo zarokên xwe pêdivî distand wiha axivî: "Ez daketime sûka bajêr ji bo ku pêdiviyên cejnê bikirim. Em bi hêvîne ev cejn bi aramî li Rojava derbas bibe. Ez Cejna Qurbanê li tevahî gelan pîroz dikim."

(en/rc)