JINHA

ŞIRNEX- Jinên li Şirnexê di konên ku ava kirine de jiyana xwe kirine hevpar, bi stranên dengbêj dibêjin re bêrîkirin, êş û berxwedanên xwe parve dikin. Dengbêj Fehîme bi jinan re tê cem hev û ji bo Şirnexê stranên xwe distirê.

Li Şirnexê bi destpêkirina qedexeyê re gelê li zozanên derodê kon vedan berxwedana xwe berdewam dikin. Gel jiyana komun ya gund li konan berdewam dike û çanda dengbêjiyê jî didin jiyîn. Dengbêjin Şirnexên stranên ku berê di dawetan de distiran îro jî ji bo Şirnexê vedibêje. Jin di konên ku avakirine de tên cem hev û ligel stranên tên gotin, bîranînên xwe parve dikin. gelê Şirnexê ku hestiyarî û hêviyên wan yekin, niha jî di jiyana xwe de dibin hevpar.

‘Em çanda xwe ya alîkariyê ji nûve qezenc dikin’

Fehîme Pusat ku li gundê Cîfanê ya Şirnexê konê xwe veda û jiyana xwe berdewam dike, ji mîkrofonên me re bêrîkirina xwe ya Şirnexê wiha anî ziman: “Bi destpêkirina qedexeyê re me xaka xwe hişt û em hatin van zozanan bi cih bûn. Jiyana vir wek jiyana me ya gunde. Her sibehê em radibin em diçin konê cîranan û rudinin. Hewcedariyên me çêbibin em ji hev dixwazin. Bi vî awayî çanda me ya alîkariyê ji nûve tê qezenckirin. Me nexwest em biçin bajarên derdorê. Ji ber ku di navbrea mirovan de qûtbûn heye. Li bajarên mezin jiyan zehmete.

‘Stranên min ji bo zarokên li Botanê jiyana xwe ji dest dane’

Fehîme ya li konekê bi jinan re hatiye cem hev, bi klamên ku dibêje, hesreta xwe ya ji bo Şirnexê tîne ziman. Fehîme ku klama ‘Şirnexa rengîn’ tîne ziman, wiha dibêje: “Tiştên li Botanê hatin jiyîn bandor li ser min kir. Li ser vê min ev klam derxist. Min li dawetan dengbêjî dikir. Dema daweta zarokên me çêdibûn min klam digotin. Lê niha ji Şirnexê dur ketim. Ez niha ji bo Botanê û zarokên jiyana xwe ji dest dane dibêjim.”

Jinên di kon de gotin : “Bila ev hesret biqede.” Her wiha gotin ew dixwazin biçin Şirnexê û wiha berdewam kirin: “Ev 3 mehe em di konan de ne. Zehmetiyên me kişand em mezin nakin. Em dixwazin vegerin Şirnexê. Em dizanin her der şewitandine lê em dixwazin biçin wir.”

(hu)