Dîdem Elî/JINHA
 
SERÊKANİYE - Şervana YPJ'ê Bêrîtan Hemo (Tekoşîn Welat) ya di şerê  Rawiya de  jiyana xwe ji dest dabû li Serêkanî  dayik û xwîşka wê behsa jiyana wê û tevlîbûna wê kirin.  
 
Di sala  2013'an de dema  çeteyên DAÎŞ'ê ketin bajarê  Serêkanî  gelek jin tevlî refên YPJ'ê bûn. Bêrîtan Hemo (Tekoşîn Welat)  jî  di heman demê de tevlî berxwedanê bû. Bêrîtan di 18 Pûşber 1997'an de li Serêkanî hate dinê û li vir mezin bû, li vir çû dibistanê. Bêrîtan dema hê  di dibistanê de dixwend Tevgera Azadiya Kurd naskir û piştre tevlî refên YPJ'ê bû. Bêrîtan piştî perwerdeya çek girt hezkirina wê ya hember  tevgerê jî mezin bû. Raste rast nikarîbû ji dayika xwe re daxwaza xwe  ya  tevlîbûna  YPJ'ê bêje lê bi navbeyinkariya hevalên xwe piştî  tevlîbûnê dayika xwe îqna kir.      
 
'Ji êrîşên çeteyan bi bandor bû û biryar da'
 
Sebîha Hemo  ya  dayika  şervana YPJ'ê Bêrîtanê ye anî ziman ku Bêrîtan biçûka  mala wê bûye û wiha axivî:  '' Dema çete êrîşî Serêkanî kirin keçika min pir bi bandor bû. Wê şevê keçika min rabû xwe amade kir û piştre tevlî refên YPJ'ê bû.''
 
Sebîha bilêv kir ku keçîka wê dema tevlî YPJ'ê bûye hevalên xwe şandine û helalî ji wê xwestiye.  Sebîha  diyar kir ku ji ber keçika xwe bi destê xwe teslîmî YPJ'ê nekiriye pir bi xemgîn bûye  û axaftina  xwe wiha domand:  '' Bêrîtan li Serêkanî di eniya şer de heta şehîd ket li ber xwe da.'' Bêrîtan  di şerê Keşto de dikeve  destê çeteyan û 13 rojan dil tê girtin. Rastî îşkenceyan tê.  Çete ji wê soz dixwaze ku carek din çek negre destê xwe û li ser vê Bêrîtan, ji bo ji destê çeteyan xilas bibe  gotina wan qebûl dike.  Bêrîtan piştre bi operasyona hêzên YPG/YPJ tê rizgarkirin. Bêrîtan, dema hevalên wê çeka wê dirêjî wê dikin ew jî bi heneka bersiva wan dide û dibêje ' Min soz daye çeteyan ez êdî çek negrim destê xwe'
 
'Wan nikarîbûn hêz û baweriya min bişikînin'
 
 Dayika Sebîha  diyar kir ku Bêrîtan li hember hemû îşkenceyên çeteyan ber xwe daye û gotiye: ''Wan çi dikir nikarîbûn hêz û baweriya min bişikînin''  Sebîha da zanîn ku   Bêrîtan berî  jiyana xwe ji dest bide jê re gotiye:  '' Dayê me kelehek  çêkiriye, tû jî were ba me û ji me re ji xwarinên xwe çêbike'' Sebîha  axaftina xwe wiha domand:  '' Dîlê hemû dayîka ji ber vî şerî diêşe lê em bi şehîdên xwe serbilindin û em ê di riya şehîdên Kurdîstanê de bimeşin.''   
 
'Bêrîtan wek kevok dihat binav kirin'
 
Seal Hemo ya xwîşka Bêrîtanê ye  axivî û da zanîn ku bi temenê xwe ji Bêrîtan mezin e lê Bêrîtan bi fikr û mijûlayî de hê pêşketir bûye û wiha  berdewam kir:  ''Bêrîtan li malê pir dihat hezkirin. Me jê re digot 'kevok' ji me re daxwaza xwe ya tevlîbûna  YPJ'ê nedigot, lê her tim nerazîbûna xwe ya jiyanê  dianî ziman herî dawî jî tevlî YPJ'ê bû û dev ji jiyana xwe berda.''     
 
 (rb/ch)