Roksan Efrîn - Perwîn Xelîl/JINHA

QAMÎŞLO - Li Qamişlo bi boneya ji nû ve avakirina Kobanê bi durişma ''Ji nû ve avakirina Kobanê girêdayî nirxê mirovahiyê ye" konfiransek hat lidarxistin.

Li bajarê Qamişlo yê Kantona Cizîrê bi boneya ji nû ve avakirina Kobanê konferansek hat li darxistin. Hemû desteyên Rêveberiya Xweseriya Demoqratîk, rûsipiyên kurd û ereb, gelek saziyên hiquqî û mirovî amedebûm jî beşdarî konferansê bûn. Konferansê bi deqeyek rêzgirtinê despêkir. Pişê li ser navê Komîteya Amedekar ya Konfiransê Remziya Mihemed axaftinek kin kir. Ser navê Rêveberiya Xweseriya Demoqratîk Serokê Meclisa Rêveber Ekrem Hiso jî nirxandinên giring kir. Piştî axaftinan derbarê kantona Kobanê de sinevizyonek hat lidarxistin, paşê Serokê Meclisa Rêveber ê kantona Kobanê Enwer Muslim bi riya Skype nirxandinek berfire kir.

Seroka Desteya Maliyê û Endama Komîteya Ji Nûve Avakirina Kobanê Remziya Mihemed di derbarê xebatên ji nû ve avakirina Kobanê de axivî û wiha got: ''Ev konfiransa ku îro li vir hat lidarxistin ji bo amedekariyên konfiransa ku wê di 2, 3'ê Gulanê de li bajarê Amedê yê Bakurê Kurdistanê, bê li dar xistin de giringe. Armanca me ji lidarxistina vê konfiransê li kantona Cizîrê ji bo alîkarî dayîna ji nû ve avakirina Kobanê û em bo çi projeyê tevlî konfiransa li Amedê bibin e.''

Berdevka Komîteya Têkiliyên Dîplomasî ya Tev-Dem'ê Çinar Salih derbarê konfiransê de axivî û wiha got: ''Xerabûna Kobanê xerabûna mirovahiyê ye, avakirina Kobanê jî avakirina mirovahiyê ye. Li ser vî esasî ev konfirans hat lidarxistin û bersiva herî rast ji bo kesên ku dixwazin xerabiyê bikin em alîkariya hev bikin.''

'Avakirina Kobanê erka her kesiye'

Endama Rêverberiya Tev-Dem ê Mizgîn Ehmed jî derbarê konfiransê de nêrîna xwe anî ziman û wiha peyivî: ''Taybetmendiya lidarxistina vê konfiransê, gelê li Cizîrê çawa bikaribe bi giyan û berpirsyartiyek li beranberî Kobanê nîşanbide û tevlî xebatên ji nûve avakirina Kobanê bibe. Taybetmendiya duyemîn di aliyê aborî de, ji bo Kobanê herkes çi dikare pêşkêş bike, dayîna alîkariyê ji bo Kobanê berpirsyartiyekî wîjdanî û exlaqî ye tu têkiliyên wî bi hizbiyetê tune ye, ji ber YPG,YPJ, Pêşmerge û Burkan El-Firat li Kobanê berpirsyartiyên xwe bi cih anîn û Kobanê rizgar kirin, em jî pêwîste erka xwe bi cîh bînin û Kobanê ji nûve avabikin.''

Her wiha gelek kesayet û ji saziyên gelê ereb jî tevlî konfiransê bûn, yek ji wan jî Hevseroka Desteya Netewa Ereban û Seroka Buroya Jinên Ereb Şêrîn El-Hemûd li ser avakirina kobanê nirxandin kir û wiha got: ''Em jî îro li vê konfiransê amedebûn ji ber ku Kobanê jî parçeyeke ji Sûriya ye û em jî bi avakirina Kobanê re ne û çi bê xwastin em amede ne. Em li vir hemû netew bûn yek dest li ser vî esasî wê projeya avakirina Kobanê bi serbikeve.''

Endama Rêveberiya PYD'ê Beşîra Derwîş derbarê Kobanê de wiha axivî: ''Kobanê roleke xwe ya girîng di tevahî raya giştî ya navnetewî de heye. Her wiha ji bo Şoreşa Rojavayê Kurdistanê û gelemperiya Kurdistanê bi berxwedana xwe yek giritin da çêkirin. Ji bo vê yekê pêwîste hemû partî û sazî ji bo avakirina Kobanê xebatên girîng bidin meşandin.''

(re- px/zt)