Jinan Şervana YPJ'ê Hasret ber bi bêdawiyê ve oxir kirin

16:51

JINHA

SÊRT - Cenazeyê Şervana YPJ'ê Hasret Aydogan (Raperîn Reşîd) a ku li Kantona Efrînê di encama qezaya trafîkê de jiyana xwe ji dest da li memleketê wê Sêrtê jinan ser milê xwe kirin û ber bi bêdawîtiyê ve rêkirin.

Cenazeyê Şervana YPJ'ê Hasret Aydogan (Raperîn Reşîd) a ku li Kantona Efrînê di encama qezaya trafîkê de jiyana xwe ji dest da li Sêrtê bi tevlîbûna deh hezaran kesan hate definkirin. Cenazeyê Aydogan ji aliyê malbat û rêveberên MEYA-DER'ê ve anîn bajar û di ketina navçeya Misircê ve ji aliyê girseyê ve hate pêşwazîkirin û anîn Sêrtê. Di ketina bajar de konvoya cenazey ji aliyê zêdehî deh hezaran kesan ve hate pêşwazîkirin. Piştî pêşwazîkirinê darbesta şervana YPJ'ê a bi alên kesk, sor û zer hatî pêçandin ji wesayîtê hate wergirtin û ji aliyê jinan ve li ser milan ber bi goristanê ve birin. Di meşê de dirûşmeyên "PKK gele gel li vir e", "Şehîd namirin" û "Ey şehît xwîna te li erdê namîne" hatin berzkirin. Di meşê de posterên Rêberê PKK'ê Abdullah Ocalan, alên PKK, KCK, YPG û YPJ'ê hatin hilgirtin. Piştî vecîbeyên olî yên li goristanê cenaze bi duayan hate definkirin. Pişt re rêzgirtin pêk hat.

Nûnera MEYA-DER'ê ya Sêrtê Bêrîvan Karakoyun di merasîma cenaze de axivî û diyar kir ku ew dê heya dawî xwedî li têkoşîna azadiyê derbikevin û wiha got: "Li ser Rojava gelek lîstin hatin lîstin. Lê serkeftina Kobanê ev lîstik hemû vala derxistin. Hemû cihanê şahidîniya lehengiya YPJ û YPJ'iyan a di berxwedana Kobanê de kir."

'Hînî mêtingerî berdewam bike em dê şer bikin'

Bavê Şervana YPJ'ê Hasret Aydogan Alî Aydogan jî wiha got: "Keça min şehîda Kurdistanê ye. Em dê heya dawî xwedî li şehîdên xwe derbikevin. Em dê her tim di riya Raperîn de bimeşin û xwedî li têkoşîna azadiya xwe derbikevin." Meta Şervana YPJ'ê Kadriye Aydogan jî diyar kir ku divê hemû kes layîkî kesên di têkoşîna azadiyê de jiyana xwe ji dest dan bibin û wiha got: "Em du şehîd dan. Niha du zarokên me ji bo gel şer dikin. Hînî zext li ser kurdan bidomin û mêtingerî berdewam bike şer dê berdewam bike."

Piştî merasîma li goristanê girse derbasî buroya hilbijartinê ya li Kolana Tîllo bû û taziye qebûlkirin.

Dê ji bo Şervana YPJ'ê Aydogan sibê li taxa Kuçuk Kirim a navçeya Ceyhanê ya Edene konê ser saxiyê bê vedan.

(zt)