Piştî 50 salan li Bedlîsê namzedek jin

13:52

Gulşen KOÇUK / JINHA

BEDLÎS - Namzeta Parlementera HDP'ê ya Bedlîsê Parêzer Mîzgîn Irgat ku yekem car namzeda jin li Bedlîsê hatiye destnîşankirin, got ku li hemberî vê pergala ku tê meşandin aciziyên wê hebûne ji ber wê jî ew di nava HDP'ê de cih girtiye. Mizgîn anî ziman ku dê HDP felsefe û ruhek nû bîne Tirkiyeyê.

Partiya Demokratîk a Gelan (HDP) a ku temsîliyeta wekhev dikeve hilbijartinan bi jinan re kelecaniyek mezin dide avakirin. Ji namzedên HDP'ê yên rengîn yek jî Mizgîn Irgat e û li Bedlîs di rêza 1'emîn de ye. Mizgîn bi xwe ji Tetwana Bêdlîsê ye. Lê ji ber polîtîkayên dewletê ku di salên 90'î de gund vala kiribûn, ew jî bi malbatî di sala 1993'an de koçî Îzmîrê kirine. Mizgîn ji ber ku di navendeke polîtîk de mezin bibû û ji çanda medreseyê dihat nasnameya wê ya polîtîk ji zarokatiyê de pêre çêbibû. Mizgîn diyar kir ku di zaroktiya xwe de li dijî polîtîkayên ku li ser nasname û çîniyê dihat meşandin bûye muxelîf û ji ber vê jî di sala 1990'î de hatiye binçavkirin. Dema li Îzmîrê lîse dixwend carek din hatiye binçavkirin û girtin. Piştî vê pêvajoyê "Bi baş fêmkirina neheqiyê ve" li Fakulteya Hiqûqê ya Zanîngeha Dîcleyê perwerde dît. Di pêvajoya parezeriyê de hem xebatên xwe yên polîtîk domand hem jî li heremê dozên siyasî, polîtîk û îhlalkirina mafên mirovan mêze kir. Mizgîn sala 2011'an de jî di bin navê "Komîteya Rêbertî" de di operasyonên KCK'ê de hat girtin.

'HDP bi jinan re ruh û felsefeyek nû dê bîne Tirkiyeyê'

Namzeda HDP'ê ya Bedlîsê Parêzer Mîzgîn anî ziman ku di temenê biçûk de li hemberî pergalê aciziyên wê hebûne û wiha pêda çû: "Bijartina min a HDP'ê jî ji vê yekê re bersivek e. Ez encax bi HDP'ê dikarim ji bo gelan têkoşînê bidim. HDP bûye hêviya hemû gelan. Her wiha îro gihîşt bi milyonan kesî. Li Bedlîsê gelek motîfên cûda hene. Di nava van motîfan de têkoşîna jinan di cihek girîng de ye. Ji ber ku gelek pêşengên vê têkoşînê yên jin li ser vê axê şehîd ketine. Di xebatên me yên hilbijaritnê de jî ku em didin meşandin, zêdetir jin piştgiryê didin û derdikevin pêş."

Her wiha di dîrokê de 50'î sal berê jinek weke parlementer hatiye destnîşankirin. Piştî 50'î salan weke jinek Mizgîn bû namzed. Dê ev jin jî di feraseta HDP'ê de biçe meclisê. HDP li dijî partiyên pergalê ku jinan dixin nav çar dîwaran, derdixe derva. Mizgîn got ku jinên ku di nava HDP'ê de cih digirin dê ji Tirkiyeyê re ruh û felsefeyek nû bînin."

Piştî pêvajoya girtinê Mizîn li Îzmîrê Hevserokatiya HDP'ê kir. Mizîng anî ziman ku li Bedlîsê di rêza yekem de cih girtina wê bi jinan re kelecaniyek mezin avakiriye û wiha domand: "Ev rewş dide xuyakirin ku partiya me çi qasî girîngî û rol dide jinan. Ji ber vê yekê ez jî girîngiyek mezin didim HDP'ê. Divê pêwira ku ji bo min hatiye dayîn ez baş bi rêve bibim. Armanca me ew e ku em ji bo partî, jin û gelê xwe re encamek baş bi dest bixin."

(aw)