JINHA

AMED - Li navçeya Amedê ya Erxeni ji bo vekirina bûroya HDP'ê de namzeta parlamentera HDP'ê Sîbel Yîgitalp axiv'i û got: '' Bi saya tevgera gelê Kurd îro jin di nava jîyanê de cîh digre. Di sîyasetên di n de di nava AKP'ê de, CHP'ê de jî jin êdî derdikeve pêş û xwedî mafê axaftinê bûye.''

Li navçeya Amedê ya Erxeni xebatê hilbijartinê bi heman hêza xwe berdewam dike. İro navçeya Erxenî,li taxa Ziya Gokalp vekirina bûroya hilbijartinê ya HDP'ê ji ali namzetên parlamenterên HDP'ê bi tevlîbûna, Hevserokên Şaredariya Erxenê Ramazan Kartal, Aygûn Taşkın û Rêveberên HDP û DBP'ê, Saziyên sivîl û bi sedan welatiyan pêk hat. Vekirina bûroyê ji avahiya HDP'ê heta ber bûroyê bi def û sloganên gel ya ' emê bıçın meclîsê', ' HDP dê bendê hilweşîne' bi meş hate destpêkirin. Di vekirinê de namzetên parlamenterên HDP'ê Nîmetullah Erdoğmuş û Sîbel Yîgîtalp axivîn. Sîbel di axaftina xwe de anî ziman ku projeya HDP'ê ne projeya niha ye, bi ked û xebatên 40 salan hatiye amadekirin û bi bedelên hezaran ciwanên me, jin û zarokên me hatiye vê merhelê.

'Aşitî dê bi destê jinan pêk were'

Sîbel axaftina xwe wiha domand: "Heta niha bi hezaran kes hate kuştin, bi hezaran kes li zindanan jiyana xwe domand. Em bi hêsanî nehatin vê merhaleyê. Em hemû wan kesên ku di vê têkoşînê de bedel dane silav dikin, bejna xwe li ber wan ditewînin.'' Sîbel da zanîn ku Jin herî zêde di van hilbijartinan de tê xuya kirin û pêş xistin û got:'' Bi saya tevgera gelê Kurd îro jin di nava jîyanê de cîh digre. Di sîyasetên di n de di nava AKP'ê de, CHP'ê de jî jin êdî derdikeve pêş û xwedî mafê axaftinê bûye. Lewre êdî wan jî fêm kirin ku jin nebe wê jiyan jî nabe, aşitî jî nabe, tengasî û pirsgirêk zêde dibe. '' Sîbel bal kişand ku hatina aşitiyê jî dê bi destê jinan be û wiha dawî da axaftina xwe:''İro her roj ji Kobanê ji deverên cuda ciwanên me, şehîdên me tên, şerekî qirêj tê meşandin. Em êdî naxwazin ev şer bidome û ên ku pêşiya vî şerî bigrin jin in. Em jin dê aşitî bînin, wekheviyê bînin.''

'Emê ji zaliman hesab bipirsin'

Namzetên Parlamenterê û mûftiyên Amedê ya berê Nimetullah Erdogmuş jî di axaftina xwe de anî ziman ku Projeya HDP'ê ji bo hemû gelan, bawerî û olan re wekheviyê dixwaze û dîyar kir ku desthilatdaran heta niha ol ji bo berjewendiyên xwe bikar anîne. Nîmetullah axaftina xwe de bal kişand ser xweseriya Dîyanetê jî û wiha pêde çû:'' xweda dînê xwe emanetî desthilatdaran nekiriye, emanetî Nemrût an jî Firavûna nekiriye. Emanetî Hz. Îbrahîm, Musa û Muhammed kiriye. Emanetî gelan kiriye.'' Nîmetullah da zanîn ku edalet jî bo her kesî pêwiste û mijara herî girînge û got:'' bila edalet di vî erdnîgariyê de cîh bigre bila pêşî em hesabê bidin. Lê em hesab nadin kesên zalim, emê hesabê ji wan bipirsin.'' Bernama namzetên parlamenterên HDP'ê bi zîyareta saziyan berdewam kir. Namzet, Odeya Zîraatê, Sîteya Sanayî yê, nexweşxane, kooperatîf û bûroya nûçeya 'Ergani Haber' zîyaret kirin.

(ch)