Li Rojava xebatên Mala Jinê berdewam dike

10:05

Sosin Xanê /JINHA

RIMÊLAN - Bi pêşketina şoreşa Rojava re,gelek guharitin di nava pergalê jiyana gelan de pêşket. Bi taybet jin li hember feraset û kevneşopiyên pergalê xwe gihand astek bilind. Têkoşîna jinan ya li her qada jiyanê, pergala desthilatdar pûç kiriye û vîna xwe bi hemû cihanê daye naskirin. Di encama têkoşîna jinan, li her qadên jiyanê xwe bi rêxistin kir û saziyên xwe bi xwe rêvedibin.

Yek ji van navendan li bajarê Rimêlan hatiye ava kirin. Derbarê xebatê Navenda bajaroka Rimêlan, Komîteya li Hevanînê ya Mala Jin Cîhan Muhemed axivî û got: " Jin bingeha civak û jiyanê ye, em bi vê zanistiyê li vir tevdigerin. Ev salek û nîv me Navenda Mala Jin li bajaroka Rimêlanê vekiriye. Di nava rêvebiriya Mala jinan de sê komîte hene,komîteya arşîvê,komîteya aborî û komîteya li hevanînê."

'Em dixwazin xebatên xwe berfireh bikin'

Di heman demê de Cîhan destnîşan kir ku ew hewildidin pirsgirêkên civak û jinan çareser bikin û got: " Em hewildidin ku bi hemû derfetên xwe alîkariya hemû jinan bikin û bi awayek hevpar kar û xebatên xwe bidin meşandin. Hemû endamên komîteya Mala Jin berpirsyarê çareserkirina pirsgirêka jine." Cîhan qala têkoşîna jinan kir û wiha dawî li gotina xwe anî: "Jin bi berdêlên mezin heya roja îro hat, têkoşîna rûmetê ya li hember pergala desthilatiya mêr bi hêze û ev yek hemû cîhan re bû mînak. Ya girîng em rêxistin bûna xwe esas bigrin."

'Ji her netew jin berê xwe dide Mala Jin'

Endamê Komîteya li hevanînê ya Mala Jina bajaroka Rimêlan Fatîma Ehmed jî derbarê çareserkirina pirsgirêka jinan wiha got: " Di mijara li hevanînê de em hewildidin ku li herdû aliyan guhdar bikin û biçin biryarê. Lê ji pirsgirêka jinan re hindek din em nêz de dişopînin. Ji her civak û netewên cûda (Ereb,Kurd,Suryanî) jin ji bo pirsgirêkên malbat û kesayetî serî li Mala Jin didin. Li gorî pirsgirêkê Komîteya alaqedar pêre mijûl dibe."
Endamê komîteyê li hevanînê Hilwe Yûsiv jî diyar kir ku, heyan ji destê wan tê ew pirsgirêkê li Mala Jinê çareser dikin,ger pirsgirêkek ku wan derbas bike warî hûkukî de ew hewaleya dadgehê dikin.

'Bi riya Mala Jin pirsgirêka keça min çareser bû'

Dayîka bi navê Diya Heleb ku bi eslê xwe erebe ji bo çareserkirina pirsgirêka kêça xwe serdana Mala Jin a bajarokê Rimêlan kiribû, got: ''Piştî sê mehan ji zewaca keça min hevjînê wê ew ji malê derxist û careke din zewicî, ji bo vê yekê me serî Mala Jin jin da û pirsgirêka xwe bi wan re parve kir.''
Diya Heleb wiha dewam kir: ''Mala jin bi me re bu alîkar û mafê me ji me re vegerand û xwadî li me derketin, piştî ku me serî li mala jin da nema li hember me derketin û şaşitî derheqê me de nekirin.''

(rc)