JINHA

TIRBESPIYÊ – Rêxistina Yekîtiya Star a bajarê Tirbespiyê 2 komînên jinan yên bi navê Ş. Werşîn û Ş. Bêrîtan hatin vekirin.

Rêxistina Yekîtîya Star li bajarê Tirbespiyê yê Kantona Cizîrê ya Rojava bi avakirina komînên jinan tekoşîna xwe di her aliyê jiyanê de berfireh dike. Li taxên El-Ferdos û Tişrîn ê ji bo jinan cîvîn lidarxistin û di civînan de 2 komînên jinan avakirin.

Di civîna li Taxa Tişrîn de gelek jinên taxê yên kurd, ereb û suryan amadebûn. Piştî deqeyeke rêzgirtinê Rêvebera Rêxistina Yekîtiya Star a bajêr Zelal Cehfer derbarê rola jinan û girîngiya avakirina komînên taybet yên jinan de axivî û got: “Ji ber ku jin jêdera çareseriya hemû pirsgirêkên civakê ne, divê jin di hemû aliyan de bên rêxistinkirin.” Zelal destnîşan kir ku birêxistina jinan di nava komînan de rola jinan di civakê de aktîf dike û rêveberiya civakê ku sîstemên sermiyadar ji wan standine vedigerîne.

Paşê jî Zelal rêziknameya komînên taybet yên jinan xwend û komîn bi awayekî fermî hate avakirin. Bi navê Şehîd Warşîn komun hat vekirin. Her wiha ji bo birêvebirina komînê hilbijartin hatin lidarxistin. di dawiyê de komîteyên girêdayî komînê “Komîteya Perwerdeyê, Komîteya Lihevanînê, Komîteya Ewlekariyê, Komîteya Aborî û Komîteya Tenduristiyê” hatin avakirin.

Di heman çarçoveyê de Rêxistina Yekîtiya Star li taxa Firdos jî bi armanca avakirina komîneke taybet bi jinan civîneke berfireh ji jinên taxê re lidar xist. Di civînê de jî Rêvebera Rêxistina Yekîtiya Star Buşra Yûsif derbarê rola jinan di civakê de axivî û diyar kir ku bi saya pêşengtiya jinan di şoreşa Rojava de destkeftiyên dîrokî hatine bidestxistin, ji ber vê yekê jî divê jin di hemû aliyên jiyanê de bêne rêxistin. Buşra balkişand ser girîngiya rêxistinkirina jinan di nava komînan de û wiha got: “Bi riya komînan jin dikarin rola xwe di avakirina civakek azad de aktîf bilîzin.”

Piştre komîn bi awayek fermî hat avakirin û rêveberên komînan jî hatin hilbijartin. Her wiha 5 komîteyên “Komîteya Tenduristiyê, Komîteya Lihevanînê, Komîteya Aborî, Komîteya Perwerdeyê û Komîteya Ewlekariyê” hatin avakirin. Bi navê Komîna Şehîd Bêrîtan komîna taxê ya jinan hat vekirin.

(zt)