Sorgul Şêxo/JINHA

TIL TEMIR - Dayîka Qemra li gel zarokên xwe salên demdirêj di nava tevgera azadiya gelê kurd de tekoşîn kirine. Bi despêkirina şoreşa Rojava re jî bi malbatî beşdarî refên berxwedanê bûne. Dayîka Qemra ya ku zarokek wê di tekoşîna azadiyê de jiyana xwe ji dest dayî, yek 22 salin li girtîgehên Tirkiyê tê girtin, yek li warên azad û zarokên wê yên dinê tevî neviyên wê di nava refên YPG'ê de cîh digirin bi xwe jî li gel zarokên xwe cîh girtiye û di dema herî dijwar de jî axa xwe ne terikand.

Qemra Hecî Hisên ya 65 salî li taxa Hemra ya Til Temirê dijî. Dayîka Qemra tevî malbat û derdora xwe ji destê rejîma Baas ê gelek kişandiye. Dayîka 11 zarokan Qemra tevî zarokên xwe di tekoşîna gelê kurd de jî kedek mezin daye. Keça wê Jiyan di sala 2003'an de di nava Tevgera Azadiya Kurdistanê de jiyana xwe ji dest daye. Keça wê Zêne jî 22 salin di girtîgehên Tirkiyê de tê girtin, zarokek wê jî di nava tekoşîna azadiya Kurdistanêdene. Dayîka Qemra ya ku 3 zarokên wê di nava tekoşîna azadiyê de yekê jiyana xwe ji dest dayî, yek di girtîgehên Tirkiyê de û yek jî li warên azade, bi xwe jî li gel zarokên xwe yên dinê û neviyên xwe li eniya Til Temirê li berxwe didin.

Dayîka Qemra ya ku li ser her qirmêçek yê ruyê wê şopên kur yên berxwedana li hember pergala deshilatiyê ya ku her demekê bi qalikên cuda derketiye pêşberî wan wiha dibêje: "Niha êdî temenê min mezine, ez weke berê ne bi hêzim. Lê dîsan jî ji bo serxistina şoreşa Rojava divê em her yek di aliyê xwe de bi seknek qayîm bisekinin. Zarokên min û neviyên min di nava refên Yekîneyên Parastina Gel de cîh digirin. Niha ew li çeperên berwedanêne. Ez her demê ji bo wan dibêjim dest ji parastina welatê xwe û gelê xwe bernedin. Ji ber parastin erka herî pîroz e. Min di tevahî jiyana xwe de serê xwe li hember ti zordaran ne daniye û ezê daneyînim."

'Di dema êrîşan de ez li gel zarokên xwe bûm'

Dayîka Qemra ya ku şahidî ji hovîtiya çeteyên DAIŞ'ê ya ser hêrma Til Temirê jî kirî desnîşan kir ku her demek zordar bi kirasek cuda êrîşî me dikin, lê bila zanibin emê ticarî axa xwe ya pîroz bi destê wan ve bernedin. Dayîka Qemra wiha qala êrîşên çeteyan ser herêma Til Temirê dike: "Di 23'ê yê sibatê de çeteyên DAIŞ'ê êrîşî ser herêma Til Temirê kirin. Em ji mala xwe derneketin û me dest ji warê xwe berneda. Her çendî zarokên min xwestin min hinek ji herêma şer durbixin ji ber temenê minê mezin, lê min derketin ne pejirand. Ez cardin jî na pejirînim, heger ez bimirim jî bila li ser axa xwe ya pîrîz biçim. Her çendî ku êrîş dijwar dibûn me jî xwe li cihê xwe asê dikir û amadekariyên xwe dikir.
Ji ber sitargeha mirovan ya herî mezin ax û warê wane. Ji ber wê jî ji bo parastina warê xwe me ticarî karê berdanê nekir."

Dayîka Qemra bilêv kir ku hêzên wan yên parastinê YPG/YPJ ji bo wan çavkaniya berxwedanê bûn û wiha dom kir: "Di çeperên berxwedanê de zarokên me YPG û YPJ hebûn. Wan di eniyên pêş de me jî di nava bajar de alîkariya hev dikir. Bi saya wan ne tenê Til Temir, Til Berak û Til Hemis jî bi serketin. Yekîtiyê serkeftin bi xwe re anî."

Dayîka Qemra bang li hemû ciwanan kir û got: "Ez bang li hemû ciwanên kurd hene ku bên cihê xwe di nava refên parastina welat de cihê xwe bigirin û parastina axa xwe bikin. Ji ber ji derveyî berxwedan û pêşxistina parastina cewherî di nava refên parastinê de wekedinê rê nîne."

(sş)