JINHA

STENBOL – Endama Heyeta Îmraliyê Ceylan Bagriyanik diyar kir ku xebat ne tenê ji bo perspektifa azadiya jinan e, di heman demê de ji bo pirsgirekên kurdan û ji bo Tirkiyeyeke demokratîk e û wiha got: “Divê em jinan jî tevlî pevajoya çareseriyê bikin. Pêvajo bi hêsanî dest pê nekir û bi hêsanî jî xilas nabe. Em jin nahêlin ku AKP pêvajoya çareseriyê qurbanî hilbijartinan bike."

Kongreya Jinên Azad (KJA) di çarçoveya komxebata xwe ya bi navê "Pevajoya çareseriye û jin" a ku dê di 9-10'ê gulanê de bê lidarxistin li Salona Civînê ya Cezayirê civîna çapemeniyê li dar xist. Endama Heyeta Îmraliyê Ceylan Bagriyanik, Hevberdevka HDK'ê Sebahat Tuncel, Namzet HDP'ê Ayşe Berktay, Meclîsa Dayîkên Aştiye û Hevseroka HDP’ê ya Stenbolê Ayşe Erdem tevlî civînê bûn. Endama KJA'yê Gulistan Taşkiran daxuyanî xwend û diyar kir ku ji Newroza 2013’an û vir ve ligel hemû polîtîkayên neçareserkirinê yên dewletê û hikûmeta AKP'ê bi hewldanên Tevgera Azadiya Kurdistanê pêvajoya çareseriyê tê meşandin û wiha got : “Di demeke ku şerên mezhebî yên li Rojhilata Navîn her der dan ber xwe û gelan qir dikin de, ev pêvajoya ku bi pêşengiya Birêz Abdullah Ocalan ve tê meşandin ji bo gelên Kurdistan û Tirkiyeyê gelek girîng e.

‘Ji bo aşitî û demokrasiye bi lezgînî dest bi hewldanan bikin’

Gulîstan anî ziman ku hemû gelên Tirkiyeyê dixwazin êdî şerê zêdehî 30 salin li Tirkiyeyê pêktê bi dawî bibe û wiha axivî: "Yek ji aliyê pêvajoya aştiyê ya ku bûye malê civakê dewlet e. Ji ber ku polîtîkayên asîmîlasyon û înkarê îflas kirin dewletê serî li diyalog û muzakereyê da. Lê li gel vê yêkê dîsa bi paketên ewlehiyê, provokasyon û êrîşên li dijî buroyên HDP'ê serî li polîtîkayên dijî vê yêkê dan. Taşkiran da zanîn ku divê ew ji bo pêvajoya aşti û demokrasiyê bi awayekî lezgîn dest bi hewildanan bikin û wiha pê de çû: “Heyeta Îmraliyê bi daxuyaniyekê diyar kir ku pêvajo di xetereyeke mezin de ye.”

‘Jinan mîsyoneke gelek girîng hilgirt'

Gulîstan derbirî kir ku pirsgirêka kurdan ne mijara çekan e û aştiyeke mayînde jî ne mijareke teknîkî ya ku dê çek kengî li kû derê bên berdan û wiha axaftina xwe berdewam kir: “Pirsgirêka kurdan pirsgirêka mafê gelekiye. Divê hemû aliyên civakî li hemberî pêvajoyê vîna xwe nîşan bide. Em jin bi komxebatan li dar xistin mîsyonekî mezin hildigirin." Taşkiran bilêv kir ku 10 madeyên di 28’ê sibatê de ji aliyê Heyeta Îmraliyê û heyeta hikûmetê ve li Dolmabahçeyê hatin aşkerakirin gelek girîng in û wiha axaftina xwe dom kir: “Bi van xalan nexşerêya nîqaşên derbarê demokratîkbûna dewlet û civakê hatin pêşkêşkirin. Heke derdorên civakî bi got û daxwazên xwe beşdarî vê pêvajoyê bibin dê di encama nîqaşan de hevpariyek pêk bê û aştiyeke mayînde û çareseriya demokratîk bi ewl bibe. Em di serî de jin, ji bo ku tevahiya derdorên civakî gotina xwe ya hevpar bibêjin û em jiyaneke çawa dixwazin diyar derfeteke pir girîng e.”

‘Jin dê pevajoya çareseriye ji hemû civakê re bikin yêk'

Gulîstan bilêv kir ku mînakên li cîhanê jî nîşan didin ku pêvajoyên muzakereyê yên ku jin beşdar nebinê, tevahiya civakê temsîl nakin û wiha domand: “Ev hem nahêle ku aştî mayîn de bibe û hem jî nahêle ku pêvajo bi awayekî zelal û li ser bingeheke baş bi pêş bikeve. Ji bo aştiyeke adil û bi rûmet; beşdariya wekhev a jinan pêvîst e. Aştiyeke ku ne bi dilê jinan be, gotina wan tê de tune be, pirsgirêkên wan ên herî bingehîn çareser neke, aştiyeke adil nîn e.” Gulîstan ku anî ziman ku ji bo komxebatê ev çar meh in xebatên xwe dimeşînin û wiha dawî li axaftina xwe anî: “Wek gava pêşîn em ê di 9 û 10’ê gulanê de li Zanîngeha Bîlgiyê ya Stenbolê 'Komxebata Azadiya Jinê ya di Pêvajoya Muzakere û Çareseriya Demokratîk de' li dar bixin. Em bang li hemû jinan dikin ku tevlî komxebatê bibin dikin."

'Em nahêlin ku pêvajoya çareseriyê têk biçe'

Endama Heyeta Îmraliyêu Ceylan Bagriyanik jî axaftinek kin kir û wiha got: “Ev xebat ne tene ji bo perspektifa azadiya jinan e, di heman deme de ji bo pirsgirekên kurdan û ji bo demokratîkbûna Tirkiye gelek girîng e.” Bagriyanik daxuyaniyên Serokomar Erdoğan jî rexne kirin û wiha axivî: “Pevajoya ku bi gotina kurd tune ye dest pê kir heta pêvajoya ku dibêje ku mase tune ye çû. Di vê çarçoveyê de divê em jinan jî tevlî xebatên pêvajoya çareseriyê bikin." Bagriyanik da zanin ku ev pêvajo bi hêsan dest pê nekiriye û hêsanî xilas nabe jî û wiha pê de çû: “Em jin destûra vê yeke nadin û em nahelîn AKP’ê bi dawî bike. Em ê pêvajoyê bi gel ra bimeşînin."

‘Divê em mil bidin tekoşina aştiye’

Hevberdevka HDK’ê Sabahat Tuncel jî mafe axaftinê girt û bi mebesta Komkujiya Dersîmê hemû komkujiyê şermezar dikin û wiha got: "Herî zêde jin di şeran de bi bandor dibin û deme muzakerayan de jî jin kêm cih digirin. Em dixwazin bi vê komxebatê tevlîbûna jinan a muzakereyan zêde bikin."

(zt)