Jin navenda çareseriya pirsgirêkên civakê ye
09:41
Dîdem Elî/JINHA
SERÊKANIYÊ - Di despêka şoreşa Rojava de li her 3 Kantonan gelek saziyên civakî, meclis û navedên jinan hatin ava kirin. Yek ji wan Navendan Mala Jin ya bajarê Serêkaniyê ye.
Bi pêşdeçuna şoreşa Rojava re, li gund, navçe û bajaran xebatên înşa kirina civaka demokratik hatine despêkirin û hîna didomin. Yek ji wan navendên ku hatine avakirin Mala jin ya bajarê Serêkaniyê a Kantona Cizîrê ye. Hevseroka giştî ya Mala Jin yê bajarê Serêkaniyê Xelat Xelîl nirxandin kir û got: "Bê jin wateya jiyan û civak tune ye. Ji ber ku avakera civakê û jiyanê jin bi xwe ye."
'Mala Jin bi hêza xwe ya çareseriyê xwe bi civakê da nasîn'
Xelat da zanîn ku wan gelek pirsgirêkên civakî û jin çareser kirine û wiha pêde çû: "Dema me Mala Jin nû vekir gelek jin dihatin û daxweza çareseriya pirsgirêkên xwe dikirin. Ji 250 dozên ku hatine destê me tenê 52 doz me dewrî dadgeha gel kir. Ev serkeftinek mezine ku jin pirsgirêkên xwe bi xwe çareser bike. Mala Jinê bi hêza çareserî û vîna serbixwe civak li dora xwe civand."
'Jin ne tenê pirsgirêkên xwe pirsgirêkê mêran jî çareser dike'
Xelat balkişand ser giringiya avakirina mala jin ji bo çareseriya pirsgirêkan û wiha berdewam kir: "Mala Jin li ser bingeha parastina mafê jinan û çareser kirina pirsgirêkên jinan hatiye ava kirin. Serî de ji ber ku Mala Jinê ye tenê jin dihatin serî li mala jin didan. Lê belê piştî ku civak dît jin dikare pirsgirêk çareser bike, êdî mêr jî berê xwe dan Mala Jinê û pirsgirêkên xwe pardikin. Jin ne tenê pirsgirêkên xwe di heman demê de, bi pirsgirêkên mêran re jî mijul dibe. Ev yek jî diyar dike ku civak bi hêza û adeleta jin bawar dike."
Xelat weke Mala Jin di derbarê pêşdeçuna xebatên xwe de jî wiha axivî: "Salek û 6 meh çêbû me Mala Jinê ya bajarê Serêkaniyê vekiriye. Her wiha di nava komîteya Mala Jinê de komîteya li hevhatin û aborî hene." Di dawî de Xelat behsa plansaziyên xwe ya demê pêş kir û wiha got: " Ji bo pêşketinê jinan em amadekariya perwerdehiyan li gund, navçe û bajêr dikin."
(rc)