JINHA

HESEKE- Çeteyên DAIŞ'ê êrîşê Navenda Asayîşa Jin a taxa Kelasê ya bajarê Hesekê kirin.

Komek çeteyên DAIŞ'ê îro di saet 10'ê de hewilda êrîşê Navenda Asayîşa Jin a taxa Kelasê ya bajarê Hesekê bike. Di heman demê de, ji aliyê din ve komên girêdayî çeteyên DAIŞ'ê bi topên hewanê êrîşê taxên Miftî û Salihiyê ya bajêra Hesekê kir.

Asayîşa Jin a Hesekê hewldana êrîşa bombeyî ya çeteyan ku bi tirmpêla bombebarkirî pêk hat, bêbandor kir û tirmpêl beriya ku bigihîje armanca xwe hat teqandin. Ji aliyê din jî, komek çete bi topên hewanê êrîşê taxa Miftî û Salihiya bajarê Hesekê kir. Di encama êrîşên topên hewanê de 3 jin û mêrekê jiyana xwe ji dest dan. Nasnameya sivîlên ku jiyana xwe ji dest dane jî wiha ne, Şemsê Elî Ebdo, Şêrîn Remedan, Selwa Beşîr Hido û Ehmed Şêxmûse.

Piştî êrîşa çeteyan hêzên YPG/YPJ'ê û hêzên asayîşê operesyon dan despêkirin. Di encama operesyona ku saetek dom kiriye, 5 çete hatin kuştin.

Têkildarî bûyerên îro derketin Rêvebira Asayîşa Jin a bajarê Hesekê Rojbîn Hesekê wiha axivî: "Emê li hember çeteyan bi hemû hêza xwe li ber xwe bidin, her çiqas hewildana wan a êrîşê pêk were jî amedakariyên me bi hêze. Bê bandor bûna çeteyên DAIŞ'ê, qelsbûna wan ya li heber hêza jin diyar dike. Ji ber vê yekê êrîş dibin ser navenda jinan, bê tehmûliya wan ya li hember hêza jina Rojava dide diyar kirin. Lê em di her warê de amedene ku bersiva xwe bidin."

(ee/rc)