Dîdem Elî/JINHA

SERÊKANIYÊ- Welatiyên Kobanê yên ku, ji ber êrîşa çeteyên DAIŞ'ê ji cih û warê xwe bune, behsa zehmetiyên koçberiyê û dexweza vegera ser axa xwe dikin.

Ji ber êrîşên hovane yên çeteyên DAIŞ'ê ser Kantona Kobanê, bi hezaran welatî neçar man cih û warê xwe biterkînin. Piştî hamleya rizgarkirina Kobanê ya ku ji aliyê şervanên YPG/YPJ'ê ve hatiye despêkirin û di encama operasyonan de çete ji bajêr hatin paqij kirin. Li ser vê yekê welatiyên ku ji Kobanê koçber bûne dixwezin bizivrin ser axa xwe. Zehra Bekîr a 55 salî ya li gundê Şêranê ya girêdayî bajarê Kobanê jiyan dikir, piştî êrîşa çeteyên DAIŞ'ê ya li ser bajarê neçar maye cih û malê xwe terk bike. Niha jî tevî hevserê xwe yê astengdar li bajarê Serêkaniya Kantona Cizîrê dijîn. Zehra Bekîr piştî ku ji bajêra Kobanê derdikeve li bakurê Kurdistan ji aliyê leşkerên tirk ve rastî kijan astangiyan tê ji me re vedibêje.

'Leşkerên Tirk me nepejrand'

Zehra bi lêvkir û got: " Dema şer nêzî bajêra Kobanê bû, em neçar man xwe li bakûrê Kurdistan bidin. Piştî rojek me li ser sînor derbas bû, roja duyem leşkerên tirk hatin û me ji cihê ku em lê derxistin û gotin 'em Kurdên Rojava li vir qebûl nakin'. Li ser vê yekê me biryar da ku em li bakûrê Kurdistan neminin."
Zehra zehmetiyên ku di dema derbasbûna bajarê Serêkaniyê de ya li ser sînor wiha ravekir: "Ji xwe dema ku em ji Kobanê derketin li bakûrê Kurdistanê rastî astengiyên leşkerên tirk û mercên mayînê yên zehmet kişand. Em gelek perîşan bibûn. Hevserê min astangdare û nikare tevbigere. Bi alîkariya hinek xizmên me, em derbasî bajêra Serêkaniyê bûn."

'Rêveberiya xweser û kurdên li bajêr xwedî li me derketin'

Zehra her wiha di dawiyê de behsa xwedî derketina gelê herêmê kir û got: "Piştî em derbas bûn, bi alîkariya Rêvebirya xweser û gelê Serêkaniyê em ji astengiyên debariya jiyanê derketin. Lê belê beramberî her tiştê jî cardin min bîra axa herêma xwe kiriye û dixwezim vegerim axa Kobanê. Piştî ku rê bê vekirin, emê vegerin gundê xwe û tevlî xebatên avakirina jiyana nû bibin."

(rc)