JINHA

NAVENDA NÛÇEYAN - Piştî qetilkirina jina kurd Ferînaz Xosrawanî li Mihabadê gel rabûn raperînê, di êrîşên hêzên Îranê yên ser gelê di raperînê de 2 kesan jiyana xwe ji dest dan. Bajarê ku ji aliyê leşkeran ve hatî darpêçkirin çalakiyên protestoyê berdewam dikin. Çalakî heya bajrê Merîwanê jî berlavbûn.

Li bajarê Muhabadê yê Rojhilatê Kurdistanê hat îdia kirin ku di 4'ê gulanê de jina ciwan a kurd Ferînaz Xosrawani ya 26 salî ji ber hewildanên îstihbarata Îranê yên tecawîzê li Otela ku lê di xebitî xwe ji qada çaran avêt û jiyana xwe ji dest da. Piştî bûyerê bajarê Muhabatê rabû raperînê, agir berdan Otela Tara ya ku bû sedema qetilkirina Ferînaz û welatiyan dan zanîn ku dê heya xwediyê otelê Nadir Moludi yê ku destê wî di bûyerê de heyî neyê darezandin çalakiyên xwe berdewam bikin.

Bajar ji aliyê bi hezaran leşkeran ve hatiye dorpêçkirin

Çalakiyên welatiyan yên duh heya derengiya şevê berdewam kir hêzên Îranê yên tayîbet êrîşî welatiyan kirin. Li gorî agahiyên ji Rojhilatê Kurdistanê hatine bi destxistin di encama bûyeran de ji aliyê hêzên tayîbet yên Îranê ve 2 welatî hatin qetilkirin, 27 kes hatin girtin û bi dehan welatî jî girtin binçavan. Ji ber bajarê protesto lê berdewam dike ji aliyê hêzên tayîbet yên Îranê ve hatiye dorpêçkirin agahî ji bajêr û çalakiyan nayê bi destxistin.

Ji Merîwanê û Silêmaniyê jî alîkarî

Ciwanên bajarê Merîwanê yê Rojhilatê Kurdisanê jî diyar kirin ku dê îro alîkariya gelê Muhabadê bikin. Ciwanên Merîwanê bang li hemû gelê Rojhilatê Kurdistanê kirin ku alîkariya gelê Muhabadê bikin.

Li bajarê Silêmaniyê yê Başurê Kurdistanê jî dê îro çalakiyên alîkariya gelê Muhabadê yê Rojhilatê Kurdistanê bê li darxistin. Dê di serî de rêxistinên jinan û aktîvîstên jin li Parqa Nalî ya bajêrê bicivin û ji bo piştevaniya Muhabadê çalakiyan lidarbixin.

(zt)