JINHA

NAVENDA NÛÇEYAN - Jina kurd ya siyasetmendar ku serê xwe li hember sêdara nemeran netewandî Şîrîn Elemholî ya ku li gel 4 hevalên xwe Ferzad Kemanger, Ferhad Wekîlî, Elî Heyderiyan û Mehdî Îslamiyan di 9'ê gulana sala 2010'an de ji aliyê rejîma Îranê ve hatîn darvekirin li peyî xwe nameyek hêlaye. Di nameya xwe de wiha gotiye: "Sedema girtina min çi ye? An jî ez çima ber bi îdamê ve diçim? Gelo sedema vê yekê kurdbûna min e? Heke wisa be ez dibêjim ku ez weke kurd ji dayik bûm. Ji ber kurdbûnê di nava jiyanake bi êş de ji her tiştî hatim bêparhiştin."

Siyasetmendara kurd Şîrîn Elemholî di sala 2010’an de ji aliyê rejîma Îranê ve tevî 4 siyasetmendarên din ên bi navên Ferzad Kemanger, Ferhad Wekîlî, Elî Heyderiyan û Mehdî Îslamiyan li girtîgeha Evîn a Tehranê hatin darvekirin. Şîrîn Elemhulî di 1984’an de li gundê Demqişlakê ya Makoyê ji dayik bû. Di sala 2008’an de ji aliyê pasdarên Îranê ve li Tehranê hat girtin. 25 rojan li cihek nayê zanîn rastî îşkenceyên giran ên fîzikî û derunî hat. Piştî 25 rojan ew birin Girtîgeha Evîn a Tehranê û xistin beşa 209’emîn a girtîgehê. Li wê 6 mehan hat girtin û piştre jî ew birin beşa jinan. Ji wê jî piştî salekê dibin beşa 15’emîn ya Dadgeha Şoreşê ya Tehranê. Ji aliyê Dozger Selavatî ve hate dadgehkirin. Bi îdiaya ku bê destûr derketiye derveyî welat 2 sal ceza lê hat birîn û ji ber têkîliya wê ye bi PJAK’ê re jî rastî cezayê dardekirinê hat. Cezayê wê di 2009’an de ji parêzerên wê re hat ragihandin û ji ber ku ew ceza neqanûnî bû parêzerên wê carek din xwestin bê darizandin. Lê dewleta Îranê bi 4 siyasetmendarên din ên bi navên Ferzad Kemanger, Ferhad Wekîlî, Elî Heyderiyan û Mehdî Eslamiyan ew di 9’ê gulana 2010’an de darve kirin.

Jina kurd ya siyasetmendara ku serê xwe ji sêdara nemerdan re netewandî Şîrîn li peyî xwe nameyek hêlaye.

Nameya Şîrîn wihaye;

“Ev 3 sal in ez girtî me. Ev 3 sal di bin şert û mercên giran de derbas bû. Ez pişt hesinên girtîgehê 2 salan bê parêzer hatim girtin. Di bin îşkenceyên pasdaran de rojên pir bi êş derbas bûn. Di vê pêvajoyê de derbarê dadgehê de min xwest bêm agahdarkirin, lê ev daxwaza min hertim bêbersiv hate hiştin. Piştî darizandinê bi awayekî ne adilane derbarê min de biryara îdamê hate dayîn. Sedema girtina min çi ye? An jî ez çima ber bi îdamê ve diçim? Gelo sedema vê yekê kurdbûna min e? Heke wisa be ez dibêjim ku ez weke kurd ji dayik bûm. Ji ber kurdbûnê di nava jiyanake bi êş de ji her tiştî hatim bêparhiştin.

‘Zimanê min pira têkîliyên mine’

Zimanê min kurdî ye, ez bi vî zimanî bi malbat, heval û nasên xwe re diaxivim. Min bi vî zimanî bi wan re têkîlî danî û ez bi vî rengî mezin bûm. Ev rê bû pira têkîliyên min. Niha jî axaftina bi vî zimanî hatiye qedexekirin. Ez nikarim bi zimanê xwe bixwînim û binivîsînim. Ji min re dibêjin kurdbûna xwe înkar bike. Ez jî dibêjim ku heke ez tiştekî wisa bikim ez ê hebûna xwe înkar bikim. Îşkenceya ku we li min kir bi şevan bû kabûsên min. Dayikên kurd hertim zarokên xwe meraq dikin. Dema ku telefon lê dide hertim bi tirsa agahiya ku zarokên wan hatine darvekirin bibîhîzin dijîn.

Di 2010’an de piştî lêpirsînê min careke din şandin Girtîgeha Evînê. Xwestin ez bi wan re bikevim nava hevkariyê. Gotin dê li hemberî vê yekê cezayê darvekirinê rakin. Dozger ji min re got: 'Me eyê par te berda lê ji ber ku malbata te alîkarî nedaye, niha tu li virî.' Dozger jî wiha got; lê ez wekî girtiyeke di destê wan de heta ku armanca wan pêk neynim min bernadin an jî dê min darve bikin. Dozger ji min re got: ‘Tu caran azadî nîn e!’

Serkeftin
03.05.2010 Şîrîn Elemholî”

(zt)