JINHA

GIRKÊ LEGÊ - 1'emîn Kongra PYD'ê li Kantona Cizîrê bi tevlîbûn û kelecanek mezin despêkir.

1'emîn Kongra Yekîtiya Demokratîk (PYD) ê li Navenda Çand û Huner a Aram Tigran a bajaroka Rimêlan a bajarê Girkê Legê yê Kantona Cizîrê bi dirûşma, "Ji Rojava ber bi Sûriyeya demokratîk ve" bi tevlîbûna 450 delege û 150 mêvanan despêkir. Di kongrê de Hevseroka Kantona Cizîrê Hediye Yûsif û Cîgirê wê Efram Isahaq, Hevserokê Meclîsa Zagonsaz a Cizîrê Hekem Xelo, Serokê Meclîsa Rêveber Ekrem Hiso û Cîgirê wî Husên Ezam, Hevseroka PYD’ê Asya Ebdulah, Endamên Desteya Rêveber a TEV-DEM’ê Ebdulselam Ehmed û Şahoz Hesen, Hevseroka Meclîsa TEV-DEM’ê ya Kantona Cizîrê Xelîl Osman, Serokê Desteya Karê Derve ya Cizîrê Ebdulkerîm Umer, Serokê Desteya Karên Hundir Kenan Berekat, Serokê Desteya Karûbarên Şehîdan Rêzan Gulo, Seroka Desteya Jinan Emîne Umer, Serokê Desteya Karûbarên Civakî Dijwar Ehmed, Serokê Desteya Parastinê Abdulkerîm Saruxan, Sekreterê PDKS’ê Cemal Şêx Baqî, nûnerên Partiya Guhertina Demokratîk a Kurdistanê Kamîran Husên û Mizgîn Zêdan, Sekreterê Partiya Çep a Kurd li Sûriyê yê berê Yûsif Dîbo, Sekreterê Partiya Komunist a Kurdistanê Necmedîn Mele Umer û nûnerên gelek saziyên civakî yên sivîl jî amade bûn.

Di salona kongreyê de pankartên, “Zanist, rêveberî û rêxistin, bingeha avakirina mirovên azad e", “Bi ruhê ciwanan em demokrasiya Rojhilata Navîn pêk bînin", “Rihê hevaltiya pîroz esasê serketinê ye" û “Siyaseta demokratîk esasê civaka ekolojîk û demokratîk e" bi zimanên fermî yên kantonê Kurdî, Erebî û Suryanî hatin vekirin. Kongre bi rêzgirtinê destpê kir û piştre endamê Meclîsa PYD’ê û Endamê Komîteya Amadekar a Kongreyê Talat Yûnis bixêr hatina mêvanan kir û bernameya kongreyê xwend.

Kongre bi axaftin û xwendina peyaman didome.

(zt)