JINHA

GIRKÊ LEGÊ – Hevseroka PYD’ê Asaya Ebdulah diyar kir ku divê ew bibin dengê jinên Rojava û got: "Jinên Rojava li hember pergala paşveru berxwedanek mezin kirin. Ji lewra Şoreşa Rojava şoreşa jinêye. Ji bo ku em jin di her qadan de xwe zêdetir bi cîh bikin, erka me piştevaniya hêzên YPJ'ê ye."

1'emîn Kongra PYD’ê ya ku bi beşdariya 450 delegeyan li Kantona Cizîrê bi dirûşma, "Ji Rojava ber bi Sûriyeya demokratîk ve" despêkirî berdewam dike. Piştî rêzgirtinê axaftina vekirinê ji aliyê Endamê Komîteya Amadekar a Kongreyê Talat Yûnis ve hat kirin. Piştre Hevseroka PYD’ê Asya Ebdulah di derbarê pêvajoyê, rewşa Rojava û tevahiya Suriyê de nirxandinên giring kir.

'Armanca me avakirina Suriyeyek demokratîke'

Asya Ebdullah destnîşan kir ku kongra wan di demek ku Rojava di qonaxeke hesas re derbas dibe û herêm rastî êrîşên çeteyên DAIŞ’ê tê de tê lidarxistin. Asya, da zanîn ku ew bênavber ji bo berjewendiyên hemû gelên Sûriyê kar dikin û wiha dom kir: “Me hin proje bi siyasetmedarên serbixwe û gelek aliyên opozisyonê yên berjewendiyên gelên Sûriyê difikirin re gotûbêj kirine. Armanca me ji vê yekê avakirina Sûriyeyek demokratîk a azad ku mafê hemû pêkhateyan biparêze ye."

Asya anî ziman ku armanca partiya wan avakirina Sûriyeyek demokratîk û destnîşankirina destûreke nû ya Sûriyeyê ku mafê gelê kurd têde bê parastin e û ev tişt anîn ziman: “Me ji bo avakirina projeya Sûriyeya demokratîk bi riya tekoşîna siyasî de kar kir. Em hêvî dikin ku hemû hêzên siyasî piştgiriya berxwedana Rojava bikin. Em di vir de dixwazin berxwedana Kobanê bibîr bixin û em bibêjin ku berxwedana Kobanê bûye sembola hemû mirovahiyê. Em bi hemû aliyan re ketina nava hevdîtin û gotûbêjan, armanca me ya sereke berjewendiya gelê Sûriyeyê ye."

Hevseroka PYD’ê Asya Ebdullah di dawiya axaftina xwe de berxwedana jinên Rojava bibîr xist û got: "Berxwedana jinên Rojava û vîna wan ya azad ji bo rêveberiya şoreşê û berxwedana wan ya li dijî hêzên paşverû bala her kesî kişand ser xwe. Ji ber vê yekê pêwîste ji bo em bibin dengê jinên Rojava kar bikin. Şoreşa Rojava şoreşa jinên azad e û erka me piştevaniya hêzên YPJ’ê ye."

(zt)