JINHA

SILÊMANÎ - Li Silêmanî ji bo piştgirya serhildana Mahabadê jinan çalakî lidarxistin.

Saziyên sivîl û rêxistinên jinan li bajarê Silêmaniyê yê Başurê Kurdistanê ji bo xwedîderktina li Ferînaz Xosrewanî li Parka Nalî çalakî lidarxistin. Rêxistinên jinan bang li her çar aliyê Kurdistanê û tayîbetî jî li jinan kirin ku xwedî li Ferînazê derkevin. Di çalekiyê de endamên RJAK û KJAR’ê jî polîtîkayên rejîma Îranê li hemberî jinan şermezar kirin û berxwedaniya hemû jinên kurd silav kirin. Aktivîsta jinan Rozerîn Kemanger di çalakiyê de axivî.

Rozerîn diyar kir ku ev ne qirkirina dawî û ya destpêkê li hemberî jinane û got: “Di dîroka rejîma Îranê de hertim qirkirinên bi vî rengî hebûye. Di bûyera kezabreşandina li Esfehanê de jî hat dîtin. Darvekirina Reyhane Cebarî û ya herî dawî jî hewildanên ji bo destdirêjiya li ser Ferînaz Xosrewanî û gelek bûyerên bi vî rengî rû dane. Divê gelê me di serî de gelê Rojhilat xwedî helwest be.

Rozerîn Kemanger bang li hemû jinanê kurd kir ku bi jinên Rojhilat re dengê xwe bikin yek û wiha domand: “Divê jinên kurd ji van çalakiyan re pêşengiyê bikin. Divê em ji polîtîkayên Îranê re bêjin bisekine. Divê gelê me li hemberî darvekirinên Îranê dengê xwe bilind bikin. Ev bêdengî divê were şikandin û bi awayek rêxistinkirî dakevin qadan."

(zt)