EBÎR EHMED/JINHA

HESEKÊ- Li Rojava bi avakirina xebatên xweser, bi pêşengtiya jin civaka nû tê înşa kirin. Li her qadê jin buye rengê jiyanê û her wiha xebatên xwe didomîne.

Bi armanca înşa kirina jiyana xwezayî û demokratik li hemû qadên jiyanê jin cihek girîng girtiye. Di derbarê xebatên jin ya li bajarê Hesekê a Kantona Cizîra Rojava de, Endamên Rêveberiya Yekîtiya Star nêrînên xwe bi ajansa me re parvekir.

Rêveberiya Yekîtiya Star Şêrîn Oso li ser girîngiya xebatên jin yên li Rojava axivî û got: "Em xebatên jin li Rojava bi rêxistin dikin û pirsgirêkên ku derdikevin bi nîqaşên hevpar ên xweser çareser dikin. Wek rêveber em hemû xebat û pirsgirêkê jinan dişopînin û hewil didin ku çareseriyên guncaw ji pirsgirêkan re bibînin."

'Kes nikare berxwedaniya jin ya li Rojava ji nedîtî ve bê'

Şêrîn her wiha li ser sekn û berxwedaniya jin ya li Rojava nirxandin kir û wiha nêrîna xwe parkir: "Jin bi vîn û bawariya xwe li Rojava seknek bi hêz raberî hemû cihanê kir. Jin pêşengtiya xwe ya li qadê şer, rêxistinî û rêveberî de bê qûsur pêkanî. Kes nikare berxwedaniya jin ya li Rojava ji nedîtî ve bê. Jin bi tevlîbûna xwe ya bê sînor wateya hebûna xwe bi hêz da avakirin."

'Ji bo çareser kirina pirsgirêkan, em avakirina komînan esas digrin'

Yesra Îlyas Endama Rêveberiya Meclîsa Jin ya Yektiya Star a bajêra Hesekê li ser şêwazê xebatê rêxistinê axivî û wiha got: "Xebatên jin di bin çavderî û rêveberiya komîteya Yekîtiya Starê ve tê rêvebirin û rêxistin kirin. Li gorî her gund,bajêr xebat tên organize kirin. Her wiha gorî bername û pilansaziyên me her 6 mehan carek pêwîste em li hev bicivin û pilansaziyên xwe ên xebatê nû bikin. Lê belê ji ber rewşên awerte ya bajêr em heftê carek li hev dicivin û pilansaziyên xwe berçavre derbas dikin. Piştre jî encamê pilansaziyên xwe em bi hemû sazî û qadên ku jin xebat lê dimeşîne re parve dikin." Yesra di heman demê de ji bo çareser kirina pirsgirêkan ew komîn avakirin esas digrin û wiha got: "Ji bo çareser kirina pirsgirêkên civak û jin me lez daye xebatê komînan. Hêviya me jî bi xebatên komîn avakirinê heye ku li
pêşiya gelek pirsgirêkên civak û jin bigre.

'Bi xwe rêxistin kirinê re jin dikare li hember paşverotiyê derbikeve"

Her wiha Endama Yekîtiya Star Mizgîn Seydo di derbara zehmetiyên ku jin dijî de axivî û got: "Jinên ku bi temenê biçûk tê zewcandin, rastî zordarî û tundiya hevserê xwe tên. Hîna jî li Rojhilata Navîn jin di bin navê namûsê de tê kuştin, rastî destavêtinê tê. Ji ber vê yekê jin çiqas hizir û ramanê Rêberê Gelê Kurd Abdullah Ocelan nasbike dikare ewqas li hember pergalê desthilatariya mêr bi hêz têbikoşe. Li hember hişmendiya desthilatdar pêwîste jin rêxistin bûna xwe esas bigre. Çiqas jin xwe bi rêxistin bike dikare li hember paşvarotiya pergalê derbikeve û serkeftina jiyanê bi dest bixe."

(rc)