Perwîn Xelîl/JINHA

RIMÊLAN - Rêvebira Rêxistina Jinan a PYD'ê Zeyneb Hebeş di derbarê rewşa xebatên jinan de axivî û got: "Çawan me weke jinên Rojava bi berxwedana xwe şoreşa Rojava weke şoreşa jinê nîşanî hemû cîhanê da, emê di nava partiyên siyasî de jî pêşengiyê bikin."

Kongireya Partiya Yeketiya Demokratîk (PYD) ya ku di 8'ê gulanê de li bajaroka Rimêlan ya Girikê Legê a Kantona Cizîrê hat li darxistin. Di kongrê de rapora rêxistina jinên PYD'ê ya xebatê hat xwandin. Rêvebira Rêxistina Jinan a PYD'ê Zeyneb Hebeş nirxandin kir û wiha got: ''Piştî kongireya 5'an a ku di 2012'an de hat lidarxistin, ji berê de jinan cihê xwe di nav partiyê de digirt lê vê carê rêxistina jin û ciwanan di nava partiyê de hate avakirin. Di aliyê rêxistinî de gelek pêşketin çêbûne û jinê cihê xwe di nav hemû komîteyan de girt. Roj bi roj pêşketin çêdibin hem di aliyê tevlîbûna jinan hem jî di aliyê fikir û raman de jî pêşketin çêdibe.''

'Têkoşîna me ji bo civaka ehlaqî û polîtîk avakirine'

Zeyneb wiha axaftina xwe dewam kir: ''Beriya niha bi salekê jinên PYD'ê li kantona Cizîrê konfiransa xwe lidarxistin, di wir de meclisa jinan hat hilbijartin. Ev meclîs ji 21 jin pêkdihat. 9 Jin jî wek desteya Rêveber di partiyê de hatin hilbijartin. Di vir de jî xebatên bajaran esas hatin girtin. Di nava partiya PYD'ê de ekadimiya ji bo pêşxistina hişmendiya ramyarî û avakirina civaka exlaqî û polîtîk hat esas girtin. Di çerçoveya xebatên ekademiyê de heya niha du dewre jin hatin perwerde kirin û dê ev perwerde di binya akademiyê de bidome."

Zeyneb derbarê zêdebûna koteya jinan ya di nava partiyê de nirxand û wiha pêde çû: ''Berê di nava partiyê de ji %40 kota jin hebû, lê niha ew kota ji holê rabûye û pêşengtî bi jin tê kirin. Ji ber ku em sîstema hevseroketiyê dimeşînin. Biryara me jî ew e ku meclisa hatiye hilbijartin kotaya jin û mêr di nava hevsengiyek de bigre. Di heman demê de di nava vê xebatê de cihek girîng dayîna pêşengtiya ciwanane."

'Jin êdî di nana qadê siyasetê de pêşengtiya şoreşê dike'

Zeyneb di berdewamiya gotina xwede wiha got: ''Êdî jin bi koteya wekhev beşdarî hemû xebatên Partiyê dibe. Piştî xebat û tecrûbeyên ku jin bi dest xistiye êdî bawariya wê li hember xwe di astên mezin de pêşketiye. Jin êdî di siyasetê de pêşengtiyê şoreşê dike û serketinên mezin bi dest dixe. Bi bedelên giran jin hebûna xwe li hemû qadên civakê avakir. Ev têkoşîn ji hemû cîhanê re bu mînake. Encama têkoşîn û berxwedana jin ya di nava hemû qadan de hêşt ku bi koteyên hevpar îro di Kongrê de jî cih bigre."

Her wiha Zeyneb wiha gotina xwe bi dawî kir: ''Em hêvîdarin ku ev kongireya ku li kantona Cizîrê pêkhatî, wê bibe pêşrojek ji bo pêşketina Rojava û Sûriyeke demokratîk û bibe nimûneyek ji bo pêşxistina îradeya jin di nav partiyên siyasî de."

'Bi rêxistina xwe xwe bighînin azadiyê'

Ji aliyekê din jî Şerîfa Hesen Endama Rêxistina Jinan a PYD'ê ye derbarê xebata jin de wiha got: ''Di nava Rêxistina jin a PYD'ê em derbasî malan dibin, ziyaretê malbatan dikin, civînan lidardixin, diçin ziyareta gundan. Di nava xebatên siyasî de em rola jin didin diyar kirin û ji bo pêşde birina xebatan em rêxistinbûna xwe bi hêz dikin. Çawan şoreşa Rojava bi navê şoreşa jin tê bi navkirin û naskirin, dê hewildana me di nava Partiyê de jî ew rola pêşengiya azadiya jin bi destxistin be. Banga min ji her jinekê re heye ku cihê xwe di nava vê şoreşê de bigre û ji bo azadî û serkeftinê xwe têbikoşe."


(rc)