JINHA

QMIŞLO - Desteya Jin a Rêberberiya Xweseriya Demokratîk a Rojava û Desteya Netewiya Jinên Ereb bi civînekê hatin bahev. Di civînê de jinan pirsgirêkên jin nava civakê de dijîn û hewlên çareseriyê nirxandin.

Desteya Jin a Rêveberiya Xweseriya Demokratîk a Rojava li gel Desteya Netewiya Jinên Ereb ji bo hevkarî û karbeşiyek baş di nava sazî û rêxistinên jinan de bê çêkirin bi hev re civînek lidarxistin. Civîna li Navenda Jin a bajarê Qamişlo ya Kantona Cizîrê a Rojava hat lidarxistin. Di civînê de ji Desteya Netewiya Jinên Ereb Seroka Buroya Ereban Xense Elhemud, Endama Emandetan a Desteya Netewî Duha Elhemud, Berpirsiyara Buroya Ciwanên Ereb Werde Cemal, Cîgira Desteya Ciwanan Mutez Elezon jî dinavê de gelek jin amadebûn.

'Emê ji pirsgirêkên tenduristiyê despêbikin'

Di civînê de sernavê Desteya Netewiya Jinên Ereb Xense Elhemud diyar kir ku ewê ser pirsgirêkên jinan rawesitin û wiha domand: "Emê navendek tenduristiyê ya bi tevger avabikin. Dê ev navenda me li hemû taxên bajêran, navçeyan û gundan bigerin, pirsgirêkên jinan di aliyê tenduristiyê de tespîtbikin û ji bo çareseriyê têkevin nava hewildanan. Di vî warî de em dixwazin weke rêxistin û desteyên jinan alîkariya hev bikin û hev temam bikin."

Berpirsyara Desteya Jin a Rêveberiya Xweseriya Demokratîk a Rojava Emîne Omer jî anî ziman ku ew amadene bi her awayî alîkariya hemû projeyên rêxistinên jinan bikin û wiha berdewam kir: "Em amadene di her aliyan de alîkariya pirojeyên rêxistinên jinan bikin. Em hevbeşiya kar ya di nava desteyên jinên kurd û ereb de gelek giring dibînin. Ev ji bo hemû jinan karek heyatiye. Ji ber wê jî divê hemû jin bi vê berpirsiyariyê nêzî van xebatan bibin. Divê ji bo hişmendîkirina jinan em hemû berpirsiyariyên xwe bînin cih. Divê jin bi hişmendî bibin, xwe rêve bibin û ji bin deshilatiya mêran rizgar bibin. Dema ku em jin alîkariyê bidin hev emê di van mijaran de serkeftîbin."

Civîn bi nirxandinên giring yên ser rêveberiya xweseriya demokratik ya jin pêşengiya wê dike dawîhat.

(re)