Dicle Arya/JINHA

BEHDİNAN - Namzetê HDP a ku bi profîla namzetên xwe zayendiya civakî bi erdê ve kiriye yek Recai Yilmaz ji bo berevajî zivirandina daraza heyî li peyî şopa keça xwe ya pêşeng bi tekoşîna xwe di nava HDP'ê de bû namzet. Keça Recai Hêvî Ronya ya PKK yî bang li bavê xwe û hemû namzetan kir û got: "Ketina HDP'ê ya meclisê ji bo berdewamkirina jiyana gelan ya demokratîk giringe. Çawa ku em ji bo jiyanek azad û demokratîk li van çiyayan şer dikin, divê ew jî di nava herêmî de tekoşînê bilind bikin. Divê rêxistian xwe bihêz bikin, bi ser û canê xwe bixebitin. Di serî de ji bo bavê xwe û hemû namzetan serkeftinê dixwazim."

Di dahurîna profîla namzetên HDP a xwediyê bangek fireh de hema bi giştî namzetên wê yên ku ji aliyê hikumetê ve hatîn perçiqandin û bi salan tekoşînê didinin. Ji wan navan yek jî Namzetê HDP'ê yê Dîlokê Recai Yilmaz e. Me xwe gihand keça Recai ya ku berî salekê beşdarî nava refên PKK'ê bûyî Hêvî Ronya. Hêvî diyar kir ku ew bi namzetbûna bavê xwe û li peyî maf û azadyê geriyana wî şanazbûye. Hêvî destnîşan kir ku ji bo serkeftinê û berdewam kirina tekoşînê divê her kes bi ser û can bixebitin.

'Ev tekoşîna vînêye'

Hêvî ya ku dema di Zanîngeha Namik Kemal a Hatayê de dixwend tevlî nava PKK'ê bûyî sedema beşdarbûna xwe bi van gotinan anî ziman: "Dema min refa yekem ya lîsê dixwend bavê min di operasyonên KCK'ê de hat girtin. Despêkê dema ku polîsan ser mala me de girtî min ruyê dijmin yê rastî dît. Di berbanga sibê de ser mala me de girtin. Polîsan mala me ji hev belav kirin. Heta li hindirê poşetên çayê jî geriyan. Heya nîvro lêgerînê dom kir. Xwişk û birayên min gelek di tirsiyan. Polîsan bi kîn û nefret li me dinêrîn. Polîsan ser me de qêr dikir. Her dema ku wan ser me de qêr dikir xwişk û birayên min jî qêr dikirin. Lê bavê min bi ti awayî serî li hember wan ne tewand. Bavê min em girtin odeyekê û li gel me axivî û got: 'Ne tirsin, hevalên we, cîranên me çî bêjin bila bêjin guh nedinê, di encamê de em ji bo dozekê tên girtin. Ev şerek yê vînêye û di vê oxurê de em amadene canê xwe bidin.' Piştî lêgerînê bavê min girtin û birin."

'Ji ber em kurdbûn paşve dihatin avêtin'

Hêvî da zanîn ku piştî demek bavê wê li Dîlokê girtî ma paşê surgunî Osmanyayê kirin. Hêvî bilêv kir ku dema ew diçun hevdîtinê weke sucdaran nêzî wan dibûn û bi çavê dijmin li wan dinêrîn. Hêvî anî ziman ku wê li cihek nijadperest xwendiye, ji ber ew kurd bûye rastî nêzîkatiyên nijadperestan hatiye û wiha domand: "Li bajarê Hatayê yê ku herî zêde faşîst lêhene min zanîngeh xwend. Ez li yurdê dimam, li wê jî hevalên min tirkbûn. Despêkê baş nêzî min bûn lê dema ku zanîn ez kurdim û ez li gel diya xwe bi kurdî di axivîm nêzîkatiyên wan li hember min hatin guhertin. Li odê ala tirkan daleqand. Li gorî wan bi kurdî axaftina me parçekirina welat bû. Paşê ez ji yurdê derketim. Ez li mala xwendekarên welatparêz dimam. Bêguman nêzîkatiyên xwendekarên welatparêz gelek cudabûn. Bi germî nêzbîna wan ya li mirovan cudabû. Di nava wan de ji her ziman, çand û baweriyan mirov di nava wan de hebûn. Piştî ku min ew naskirin êdî ez diçum Komeleya Xwendekarên Zanîngehê û dihatim."

'Ji doza min bawerdikir gav paşde ne avêt'

Hêvî diyar kir ku piştî wê xwendekarên welatparêz naskir tevlî nava xebatan bû. Hêvî da zanîn ku sedema herî mezin ya ew tevlî nava xebatan kirî jî Şoreşa Rojavaye. Hêvî anî ziman ku ew mal bi mal digeriya alîkarî ji bo Kobanê berhev dikir û wiha berdewam kir: "Kampanyeya alîkariyê ji bo Kobanê hatibû despêkirin. Min qutiyên pênusan difirot û wiha alîkarî dida kampanyayê. Di nava hefteyekê de min bi qasî hezar lîreyan dahev û teslîmî hevalan kir. Me 5 hevalan bi hev re xebat dikir. Roja ku min pênûs difirot li Pirsus û Kobanê çalakî hebû. Em çun sînor. Li wê hevalek me şehîd ket. Ji bo me rojek xirb bû. Lê me dest ji tekoşîna xwe berneda. Me zêdetir lez da xebatên xwe û mezintir kir. Berxwedana me tekoşîna me gihand xala herî bilind."

'Min xebatên xwe gihand çiyayên azad'

Hêvî got: "Her roja diçu em mezin dibûn, bi hêz dibûn. Me komele avakir û lez da xebatên xwe yên jinan." Hêvî destnîşan kir ku her dem polîsan ew dişopand û der dora mala ku lê dima digirtin û wiha dom kir: "Her şev teqîba min dikirin. Heya serê sibê polîsan mal çavdêrî dikirin. Li gel hemû tindiya wan jî min ji doza bawer dikir gav paşde ne avêt. Ez tehdîd dikirim. Ez êdî tenê bi wan xebatan re sînor nemam. Ez beşdarî Konferansa Jinên Ciwan ya Amarayê bûm. Lê wê nakokiyên min hîn zêdetir bûn. Em li aliyekê di xebitîn li aliyê dinê jî me dibistana pergalê dixwend û em diketin ezmunên ku wan amade dikirin. Me li hember dijmin tekoşîn dikir û li aliyê dinê em neçar diman di waneyan de guhdarî derewên wan jî bikin. Ev tenê bi xebata min nedibû. Paşê jî min biriyara vê xebata xwe li çiyayên azad berdewam kirinê da."

'Ji ber heskirina gel min berê xwe da çiyan'

Hêvî wiha berdewam kir: "Li vêderê piştî demek dirêj cara yekem min berf dît. Cihê ku em lêdiman rêya wê girtîbû. Min bi hevalan re gulmanê kir. Bêguman kelecana min zêdebû. Di serî de ketina nava xwezayê û şertên çiyê hinek ez dam zorê. Ji ber ez her dem li deverên betonê mabûm, pergal mirovan hemtal dike. Lê hînbûna jiyana nava xwezayê gelek ne kişand. Dema ku min Rêbertî xwend girêdana min ya çiyan û nêrîna min ya li tekoşînê hat guhertin. Ji ber di serî de min gelek ji malbata xwe û hemû gel hez dikir ji bo wê min berê xwe da çiyan. Ez niha li van çiyayan tekoşînê dikim. Divê neyê jibîrkirin ciwan di nava pergala helandinê de hatin hiştin. Divê ciwan ji rewşa têdenin bên xilaskirin. Divê êdî ciwan rabin ser xwe û xwe ji wê pergala heyî daweşînin."

'HDP ji bo aştiyê gelek giringe'

Hêvî bilêv kir ku ji bo serketina hilbijartinê divê di serî de bavê wê û her kes bi giyana seferberiyê bixebitin û di dawiyê de wiha got: "Ketina HDP'ê ya meclisê ji bo berdewamkirina jiyana gelan ya demokratîk giringe. Çawa ku em ji bo jiyanek azad û demokratîk li van çiyayan şer dikin, divê ew jî di nava herêmî de tekoşînê bilind bikin. Divê rêxistian xwe bihêz bikin, bi ser û canê xwe bixebitin. Di serî de ji bo bavê xwe û hemû namzetan serkeftinê dixwazim."

(zt)