Perîn Xelîl/JINHA

QAMÎŞLO- Endama Rêvebira Peywindiyên Dîplomasi ya TEV-DEM'ê Çinar Salih, li ser rewşa Rojava ya dawî nirxandin kir û wiha got: "Em ji her demê zêdetir nêzî serkeftinê ne."

Endama Rêvebira Peywîndiyên Dîplomasî ya TEV-DEM'ê Çinar Salih li bajarê Qamîşlo yê Kantona Cizîra Rojava, li ser pêvajoya dawî ya li Rojava bi ajansa me re nêrînên xwe parkir. Çinar destnîşan kir ku ew di demên girîng re derbas dibin û wiha got: "Pêvajoyên bi vî rengî ji bo hemû netewên bindest pêvajoyên destkeftiyan bi dest xistine. Dema ku hêzên desthilatdar li ser bingeha berjiwandiyan li hev nekin di encamê de nakokiyên hûndirîn û pevçûnên dijwar di navbera hêzan de rû didin. Li hember vê yekê civak eger rêxistina xwe bi hêz bike û hêza xwe ya polîtîk diyar bike, di şert û mercên bi vî awayî de derfetên serkeftinê gelek mezin dikare bi dest bixe. Guhartin û pêşketinên ku li dora me pêktên, dibe ku hêzên navnetewî jî di nava vî şerî de cihê xwe bigirin. Lê belê mafên me yên adîl û hêza ku me di vê pêvajoyê de ava kiriye, hêviya me ya serkeftinê hîn zêdetir dike. Her wiha di vê pêvajoyê de têkoşîna me ya li hember tundraw faşizma DAIŞ'ê û hevkarên wê tenê şerekî herêmî nîne ev şerkî cîhaniye û navnetewiye."

'Karektera pêvajoyê jinan diyar kir'

Çinar da zanîn ku bingeha têkoşînê ya herî girîng serkeftina netewên bindeste û wiha dom kir: "Karektera pêvajoyê jin bi berxwedaniya xwe ya li hember pergalê û paşvarotiyê diyar kir. Xilasiya civakê bi azadiya jinan pêktê. Armanca têkoşîna me ya herî girîng serkeftina jinan û civakê esas girtine. Ji ber vê yekê jin îro bi wê zanistê tevdigere. Hem di warê parastinê de hem jî di warê pêşxistina taxtîkên leşkerî de pêşengitiyê dike. Her wiha di pêşde birina pêvajoyê de û erkên rêxistina civakî de jî xwe gihandiye asta çareseriyê. Sedema herîkîna jin ya di nava şoreşê de jî bingeha xwe ji vê berxwedaniyê û têkoşînê digre; ya rast jî eve. Em serkeftina şoreşê di berxwedaniya jin de dibînin."

'Bi kesayetên azad emê malbatên demokrat avabikin'

Çinar di dawiya gotina xwede behsa projeyên avakirina civaka demokratîk kir û wiha pêde çû: "Em li ser hêmanên wekheviyê û vîna azad avakirina xebatên xwe didin meşandin. Ji bo ku em malbatên demokratîk avabikin pêwîste em li ser hebûna kesayeta di nava malbatê de cih digre rawastin. Her wiha em hewil didin ku malbatên ji hişmendiya mulkiyetê dûr bidin avakirin û bi forma malbata ku bibe kevirê bingehî ya civaka demokratîk sazbikin. Em di vê bawariyê de ne ku bi xebatên hevbeş û perwerdeyên rêxistinî wê ev pirsgirêk jî bi demê re çareser bibe. Ji ber ku derfetên di destê me de bi hêzin.

(rc)