Dîdem Elî/Şînda Ebdela/JINHA

SERÊKANİYÊ - Li Rojavayê Kurdistanê bi pêşketin û berxwedana şoreşa Rojave re, xebatên avakirina jiyana xweser ya li hember rêjîma Baasê bê navber didomin.

Bi pêşketina şoreşa Rojava re, jin bi pêşengiya xwe di nava hemû sazî û xebatan de bi awayek aktîf cihê xwe digre. Li aliyê din li bajarê Serêkaniyê û Dirbêsiyê ya Kantona Cizîra Rojava xebatên Şaredariya bajêr bi hemû qadên xwe jin pêşengtiyê jêre dike. Di derbara xebatên Şaredariya bajêra Serêkaniyê de Seroka Şaredariya Bajêr Cîhan Ebidezîz axivî û got: "Bi pêşengiya jin emê sîstema jiyana demokratîk li her derê bidin runişkandin."

Cîhan behsa rola jin ya di nava şoreşa Rojava de kir û wiha domkir: "Li Rojava em bi pêşengiya jin li her derê xebatên xwe yên civakî, sîyasî, aborî, ekolojîk û polîtîk didin meşandin. Li hember hişmendiya pergala Baasê em civaka bi destê jin ji nûve înşa dikin. Emê bi pêşengiya jina Rojava, sîstema jiyana demokratîk li her derê bidin runişkandin. Her çiqas hişmendiyên kevin ya ku bi salane li ser pergala desthilatiyê hatiye runişkandin vê yekê nepejrîne jî, jin bi berxwedana xwe ya bê hempa vê hêzê da nîşan kirin ku, ewê bi destê xwe civaka ehlaqî û polîtîk bide avakirin."

'Şaredariya bajêr bi modela ku jin diyar dike tê meşandin'

Cîhan her wiha destnîşan kir ku girîngiya xebatê jin ya di nava Şaredariyê de geleke û wiha got: "Jin di xebata Şaredariyê de gelek xebat daye ser milên xwe. Jin di nav hemû qadên wek, endezyar, perwerde, raghandin, ekolojî, werzîş û xizmetên civakî de cihê xwe digre. Li ser van mijaran her heftê em perwerde û nîqaşan didin meşandin. Bi awayek hevbeş em xebatên xwe di nava gel de didin rêvebirin. Li aliyê din projeya avakirina komînan ya li gund û bajêr dihêle ku hemû xebat bi awayek xwezayî û bi îradeyê civakî derbikeve pêş. Ev proje bingeha avakirina jiyana demokratîke."

'Em hêza xwe ji berxwedana YPJ'ê digirin'

Cîhan da zanîn ku bi saya berxwedana jina Rojava û şervanên YPJ'ê îro ew karîne li her qadê xwe bi rêxistin bikin û wiha pêde çû: "Bi fedakarî û berxwedana şervanên YPJ'ê ya di şert û mercên zehmet da li çeperan şerdikin, em li her qadê rêxistina xwe bi hêz dikin. Bi avakirina rêxistina parastinê ve di nava civakê de me dest avêt hemû xebatên civakî. Ev yek jî dê bibe modela jiyana nû ji hemû gelê cîhanê re."

'Xebatên me bi pilansaziya hevbeş didome'

Her wiha Hevseroka Meclîsa Şaredariya Gel ya bajêra Dirbêsiyê Mûne Îbrahîm Dawîd derbarê xebatên şaredariyê de axivî û got: "Em wek jin di her qadê de xebatên xwe didin meşandin. Yek ji van xebatan peywirdarê şaredariyê, beşa aborî, xizmetên civakî, meclîsa pêşbazî, maliye û her wiha meclisên giştî de jin bi awayek aktîf cihê xwe digre. Xebatên me bi awayek hevbeş û bi plansazî tên rêvebirin."


Mûne li ser tevlîbûna jina ya di nava xebatê şaredariyê de nirxand û wiha pêde çû: "Ji sedî 50'î jin cihê xwe di nava hemû xebatên şaredariyê de cihê xwe digre. Plansaziyên xwe ya xweser her hefte çêdikin û perwerdeyên xwe dîbînin. Eger pirsgirêkên wan hebe ango pêşniyarê wan hebe, ji rêvebirên xwe yên şaredariyê re radigînin û bi vî awayî tê çareser kirin. Gelek plansaziyên me hene, yek ji van plansaziyên me, darên ku di 4'ê Nîsanê de me çandiye emê wê zeviyê bikin baxçe, ya duyem jî, di warê xweşik kirina bajêr de jî dê xebatên me bên kirin. Her wiha perwedehiya ajokartiyê wê ji jinan re were dayîn, ev yek jî di binya şaredariyê de bi awayek fermî dê bê meşandin."


(rc)