JINHA

AMED - KJA'ê bi boneya 15'ê Gulanê Cejna Zimanê Kurdî daxuyanî da û got: "Em wek KJA cejna zimanê dayikê li hemû gelê kurd pîroz dikin û banga li hember bişaftin û tunekirinê li çand û zimanê xwe xwedî derketinê li her kesê dikin."

Kongra Jinên Azad (KJA) yê bi armanca 15'ê Gulanê Cejna Zimanê Kurdî daxuyaniyek nivîskî dan. Di daxuyaniyê de balhatkişandina ser çewisandinên ser ziman û wiha hat berdewam kirin: "Ziman hebûna çand û dîroka civakê îfade dike. Tunebûna ziman tê wateya tunebûna civakê. Kurdan bi hezar salan hewl dane ku hebûna xwe ya civakî û çandî biparêzin. Lê hê jî Kurdî wek ziman nayê pejirandin. Ev yek jî tê wateya nepejirandina hebûna kurdan. Bersiva herî mezin Tevgera Azadiya Kurd daye kesên ku digotin 'Kurd tune ye û navê kurdan ji dengê kart û kurt peyda bûye.' Têkoşîna azadiyê gelek û civakek ku hebûna wê jî nedihat qebûlkirin, afirandiye û daye pejirandin. Di pêşvekirina zimanê kurdî de xebatên girîng di sala 1932'yan de ji aliyê Celadet Alî Bedîrxan ve bi weşandina kovara Hawar dest pê kirin. Piştî wê 15'ê Gulanê wekî Cejna Zimanê Kurdî tê pîrozkirin."

'Li Amed, Gever û Cizîrê dibistanên kurdî hene'

Daxuyaniyê wiha dom kir: "Komara Tirk ji destpêka avakirina xwe heta niha li hemberî gelên cuda polîtîkayên asîmilasyon û tunekirinê roj bi roj zêdekirine. Gelê kurd li hemberî înkar û polîtîkayên tepeserkirinê yên dewletê bi têkoşîna xwe ya 40 salan li ber xwe da û xwedî li zimanê xwe yê zikmakî derket. Bi vekirina dibistanê xwe bi awayekî zelal bertek nîşanî vê qirkirinê daye. Li Amed, Gever û Cizirê gel bi îmkanên xwe dibistanên Ferzad Kemanger, Dayika Uweyş û Bêrîvanê vekirin. Dewleta ku tahamûlî dibistanên me nekirin û mohra girtinê lêxistin. Gelê me bi bertekên xwe yên hêja xwedî li dibistanan derket. Hîn jî ji bo ku girtiyên siyasî bi kurdî parastina xwe bikin, derfet nehatine afirandin û di vê mijarê gelek dadgeh kurdî nas nakin. Lê bi xwedîderketina zimanê dayikê dîlên azadiyê ev asteng heta dereceyekê şikandiye. Em jî wekî KJA'yê cejna zimanê dayikê li hemû gelê kurd pîroz dikin û bang dikin ku li dijî asîmilasyon û tunekirinê li çand û zimanê xwe xwedî derkevin."

(zt)