JINHA

AMED - KJA û Meclîsa Jinên Ciwan a DBP'ê bi armanca şermezarkirina êrîşa zayendî ya sixûrên Îranê li hemberî jina kurd Ferînaz Xosrawanî a ku li Mahabat di otela ku têde dixebitî xwe ji qata 4'emîn avêt û jiyana xwe ji dest da meş lidarxistin. Namzeta HDP'ê ya Amedê Feleknas Uca diyar kir ku êrîşa li hemberî Ferînaz li hember hemû jinên kurd hatiye kirin.

KJA û Meclîsa Jinên Ciwan a DBP'ê ji bo Ferînaz Xosrawanî a ku li bajarê Mahabatê ji ber êrîşa zayendî ya sixûrên rejîma Îranê xwe ji qata 4'emîn a otela ku têde dixebitî avêt û jiyana xwe ji dest da bi meşekê şermezar kirin. Li gel hemû astengên polîsan jin ji ber buroya hilbijarinê ya jinan a Surê heya ber buroya hilbijarinê ya jinan a Ofîsê meşiyan. Jinên ku dixwestin di rêya Ekîncîlerê de derbazî Ofîsê bibin rastî astengiya polîsan hatin. Di meşê de alên PKK, KJA, YPG,YPJ, wêneyê Rêberê PKK'ê Abdulah Ocalan, wêneyê Ferînaz Xosrawanî hatin hilgirtin. Di meşê de pankarta "Ferînaz Xosrawanî nasnameya jinê ye, xwedî li nasnameya xwe derbikeve" hate hilgirtin û diruşmên "Bijî berxwedana Mahabadê", "Bijî Serok Apo", "Jin jiyan azadî" û "Destê dirêjî jinê bibe bişkin" berzkirin. Namzetên HDP'ê yên jin ên Amedê Çaglar Demîrel ,Sibel Gedik, Feleknas Uca û Hevşaredariya Surê Fatma Şik Barut, Hevseroka DBP'ê Hafîze Îpek û gelek jin tevlî meşê bûn.

'Ev buyer buyerek îdelojîk û polîtîke'

Piştî ku girse gihişt ber buroya hilbijartinê daxuyanî hat dayîn. Endama Dem-Genc'ê Xezal Aslan diyar kir ku polîtîkayên hişmediya ne tenê li Rojhilatê Kurdistanê, li hemû Cihanê de bi destê dewlet û hişmendiyek tê meşandin.

'Tekoşîna me ew ê devam bike'

Namzeta HDP'ê ya Amedê Feleknas Uca jî diyar kir ku êrîşa li hemberî Ferînazê hatî kirin li hember hemû jinên kurd hatiye kirin û wiha got: "Niha jî ev êrîş li Şengalê bi destê DAİŞ'ê li ser jinê tê kirin." Feleknas anî ziman ku ew silavan ji gelê Rojhilat ê ku ji bo Ferînazê rabû ser piyan dikin û wiha axivî: "Heta jin azad nebe em ê tekoşîna xwe berdewam bikin."

Namzeta HDP'ê ya Amedê Çaglar Demirel jî anî ziman ku ew hemû qetlîamên li dijî jinan tên kirin şermezar dikin û wiha got: "Wek jin emê bi rêxistin bibin û tekoşînê berdewan bikin."

Pîştî axaftina jinan çirayê mirazan firandin.

(do/zt)