Dîdem Elî/JINHA

SERÊKANİYÊ - Şervanên YPJ'ê hemleya paqij kirina gund û bajarên Kantona Cizîrê nirxandin.

Li bajarê Serêkaniyê ya Kantona Cizîrê, piştî êrîşên çeteyên DAIŞ'ê ya li ser bajêr û gundên derdor, şervanên YPG/YPJ'ê operesyon dan despêkirin. Operesyona ku ji 6'ê Gulanê ve hatî despêkirin bê navber didome. Piştî ku hêza YPG/YPJ'e dest bi hemlê hat kirin, hin gundên Ereban ji hêzên YPG/YPJ'ê daxweza parastinê kirin. Li ser daxweza gelên Ereb jî operesyon hat berfireh kirin. Derbarê hemleya ku hatiye despêkirin de, Fermendara Yekîniya Parastina Jin ya bajarê Serêkaniyê Aryen Cûdî nirxandin kir.

Aryen armanca operesyonê wiha ji me er vegot: "Li ser daxweza gel ya parastinê me biryarê vê operesyone da. Ne tenê ji bo gelê Kurd her wiha ji bo hemû netewên ku li vir dijî pêwistî bi ewlekariya jiyanê wan heye. Hemleya me hîna didome, lê cihê ku çete jê hatine rizgar kirin rewşa jiyanê dizivire aramiyê."

'Şervanên YPJ'ê bi berxwedana xwe coş da şoreşê'

Aryen da zanîn ku, cihê çeteyên DAIŞ'ê lê hebin gel nikare li wir bijî û wiha pêde çû: "Gel ji ber dagirkeriya çete nikarin êdî bijîn, ji ber vê daxweza parastinê ji hêzên YPG/YPJ'ê dikin, baweriya gel bi hêzê YPG/YPJ'ê tê. Operesyona me ya bê navber didome. Gelek bajar û gund ji destê çeteyan hatin rizgar kirin. Bi despêkirina operesyonê re, gelek tevlîbûn ji refên YPJ'ê re çêbûn. Ev yek bingeha xwe ji coş û berxwedana şervanên YPJ'ê digre. Jina kurd bi sekin û berxwedana xwe buye navenda avakirinê û rêvebirinê."

Aryen di dawiya gotinê xwe de serkeftina operesyonê li tevahiya gelê Kurdistanê pîroz kir û got: "Serkeftina hêzên YPG/YPJ'ê serkeftina hemû gelê bindeste. Ji ber vê yekê em serkeftina operesyona tolhildanê li hemû gelê Kurdistanê pîroz dikin."


(rc)