JNHA

QAMİŞLO- Rêxistina Rojava bi durişmeya ''Zarokên me pêşeroja me ne'' ji bo zarokên dibistanan alîkarî belav kir.

Rêxistina Alîkariyan a Rojavayê Kurdistanê li bajarê Qamişlo ya Kantona Cizîr bi armancê alîkariyê bidin zarokan pêdiviyên wek (pêlîstok, cilê zarokan, pêlav û hin pêdiviyê xwarinê) şandin navenda Weqfa Jina Azad. Li ser vê yekê Weqfa Jina Azad, ew pêdiviyên ku hatine, li dibistanên taxa Qidûr Bek, Qenat Siwês, Xerbî û Kornîş ya bajarê Qamişlo li zarokan hat belav kirin. Di derbarê xebatê alîkariyê de Rêveberiya Têkiliyên Dîplomasî ya Rêxistina alîkariyan a Rojava Hemîda Ferman axivî û wiha got: ''Em her dem dixwazin alîkariyên pêwîst ji bo gel pêşkêş bikin û bi taybet ji bo zarokan. Di şert û mercên şoreşê de alîkariyên bi vî awayî gelek girînge. Bi taybet ji bo zarokan wê bibe sedema kêfxweşiyê."

Hemîda behsa xebatên berhev kirina pêdiviyan kir û wiha got: ''Ji bo pêşkêşkirina alîkariyan me gelek hemle da destpêkirin. Pêdiviyên me berhev kirine wek cil, pêlîstok, xwarin û her wiha pêdiviyên din yên zarokan me amede kir. Em dixwazin xebatê xwe di vî warî de bidomînin. Bi taybet ji bo zarokan. Ji ber ku zarok pêşeroja Rojavayê Kurdistanê ne. Li gorî şert û mercê heyî, pêdiviyên ku me amede kiribû kêmbû, lê belê dê ev xebatên me bidomin. Em bang li tevahî saziyên civakî dikin ku, dest bidin hev û ji bo pêşerojê amedekariya nifşek nû bikin. Hem di warê raman de hem jî di warê jiyanî de zarok pêwîstî wan alîkariyê heye. Emê hewil bidin ku navenda zarokan li bajêr vebikin"

'Emê hewilbidin bi her awayî alîkariya zarokan bikin'

Rêvebera Rêxistina alîkariyan a Rojava Hember Hesen jî nêrînê xwe di derbarê girîngiya belavkirina alîkariyan de axivî û wiha got: ''Pêşkêşkirina alîkariyan bi taybet ji bo zarokan gelekî girînge, ji ber ku zarokên me her tim di nava xizanî de jiyan kirine. Her çiqas derfetên me kêm be jî em wek rêxistina alîkariyê xebatên me yên bi vî awayî wê bidome. Hêviya me ew e ku zarokên me her di rewşên aram de jiyan xwe bidomîne.''

Endama Rêvebira Weqfa Jina Azad Hena Elî spasiya xwe ji saziya alîkariyê re anî ziman û wiha got: "Em spasiya Rêxistina Rojava ya alîkariyan dikin ku di demek wisan de bûn alîkar. Ev helwest wê bibe mînak ji bo pêşxistina zarokan."

(re/rc)