JINHA

DÊRIK – Hevseroka PYD’ê Asya Ebdulah diyar kir ku Sûriya pêşerojê dê welatekî ne navendî û demokratîk be. Asya bang li jinên Rojava kir ku berxwedana xwe xurt bikin ji ber ku bûna mînaka hemû jinên berxwedêr.

Partiya Yekîtiya Demokratîk (PYD) li bajarê Dêrikê civîna gel lidar xist. Civîn bi beşdarbûna sedan şêniyên herêmê bi Hevseroka PYD’ê Asya Ebdulah li navenda Çand û Hunerê ya Dicle ya Dêrikê bi rêzgirtinê dest pê kir. Paşê Hevseroka PYD’ê Asya axivî û bal kişand ser pêşketinên siyasî di herêmê de û got ku gelê kurd li Roajva ku ji destpêka şoreşê de xeta sêyemîn girtibû gelek destkeftî bi destxistine. Asya destnîşan kir ku pêwîste ew heta dawî xeta xwe ya sêyemîn bişopînin û xeta xwe ya berxwedanê zêde bikin û wiha dom kir: "Niha hemû parçeyên Kurdistanê di rewşên hesas re derbas dibin, ji ber vê yekê û li gorî guhertinên têne jiyankirin, pêwîste gelê kurd ji van guhertinan fayed bigre û yekîtiya xwe xurt bike."

'Jinên Rojava ji bo hemû jinên herêmê bûn mînak'

Asya bal kişand ser rewşa heyî ya Sûriyê û got ku hêzên opozisyonê nikarîbûn bibin dengê şoreşa gelê Sûriyê û wiha dom kir: "Çareserkirina aloziya Sûriyê ne mumkine bêyî gelê kurd bên çareserkirin. Opozisyona Sûriyê tu hêzê li ser erdê nagre, nikare pêşeroja Sûriyê destnîşan bike. Ne mumkina aloziya Sûriyê bê sîstemeke demokratk a ne navendê ku mafê hemû pêkhateyan bipararêze, pêk were."

Asaya di axaftina xwe de bal kişand ser rola jinan di nava şoreşa Rojava de û got: "Jinên Rojava bûne mînaka berxwedanê ji bo hemû jinên herêmê." Di dawiya axaftina xwe de Asya Ebdulah bang li hemû jinên Rojava kir ku asta berxwedana xwe mezin bikin û di avakirina Kobanê de rola xwe bi awayekî aktîf bigirin.

Di dawiya civînê de bersiva pirsên beşdaran hate dayîn.

(zt)