Mala Jin ya Qamişlo navnîşana despêkê ya jinên rastî şidetê têne
11:05
Roksen Efrîn /JINHA
QAMİŞLO - Ji ber hişmendiya civakê a kevneşop jin her di mal û jiyana xwede dibe qurbanê bêmafî û tûndiya mêr.
Her roj bi sedan jin ji aliyê mêran ve rastî tundî û kuştinan tên. Yek ji jinên ku rastî tundiya hevserê xwe hatiye Xeda Îbrahîm a ku li taxa rojhilatê Qamişloyê ye. Xeda Îbrahîm behsa êş û zehmetiya ku weke jinek jiyan dike kir û wiha got: "Berî 11'e salan bê razîbuna min, ez bi kurê apê xwere hatim zewicandin. Demên borî li gorî irf û adetên civakên me, nêrînê jin ne dihat pejrandin û zewacê bi kurê apê xwe re mecbûriyetekbû. Ji ber vê yekê min bi zorê dan kurê apê min."
'Xweşka min jî bi zorê dan zewicandin'
Xeda wiha domkir: "Wan deman baş tê bîra min, dema ku min ne razîbuna xwe anîbu ziman, dayika min digot 'nabe tu wî red bikî, ji ber te dê navbera herdû malbatan de ne rihetî û pirsgirêk derbikeve'. Gelek rojên bi êşbun û ji bîra min tu car naçe. Piştre xweşka min jî bi dara zorê dan zewcandin. Kevneşopiya civakê jiyan jinê fetisandiye."
Xeda behsa jiyana xwe ya piştî zewacê kir û wiha pêde çû: "Di serî de pirsgirêkên me ên aborî hebû, ji bo ez jî bibim alîkar min kargehek vekir û da xebitandin. Pişt re keçek min çêbû, lê ji ber ku nexweşbû min piranî bi keça xwe re mijûl bum. Her ku çû rewşa keça min giranbu û derfetên aborî têrê nedikir ez derman û nexweşxaneya bigerinim ji ber vê min hindek zêrê xwe jî firotin. Jiyana min her di nava zehmetiyan de didomî. Bi saya kargeh û zêrê min a mayî hevserê min ji xwe re zevî kirî û da xebitandin. Dema ku hevserê min pere û zêrê min stand gotibu 'ezê cardin ji tere bizivrînim'."
Xeda anî ziman ku piştî rewşa malbatê a aborî başbû hevserê wê êdî dest bi tundiyê li ser wê kir û wiha got: "Bi başbûna rewşê malbatê a aborî re hevserê min dest bi tûndiyê li hember kir. Ji bo ku min berde hincet peyda dikir û her roj pirsgirêkek derdixist û li min dida. Di salekê da çar caran min ji mal avêt. Malbata wî ji li hember vê yekê tu bertek nîşan nedida."
'Zarokê min li berçavê min vedişêre'
Xeda wiha got: "Keça min li ba min bu, hevserê min hat û zaroka min ji ber singa min girt. Ez bîra bêhna zaroka xwe dikim lê tiştek ji min re ne hêşt. Ji bo ku ez zaroka xwe nebînim ew bir gund ba dayika xwe."
'Ji bo mafê xwe min serî li Mala jin da'
Xeda wiha dawî li gotina xwe anî: "Ji bo mafê xwe ya xwezayî min serî li Navanda Mala Jin a bajarê Qamişlo da û hevserê xwe gilî kir. Ez hêvî dikim mafê min were girtin û bihêna keça xwe carek din bigrim."
(rc)