Gulşen Koçuk / JINHA

COLEMÊRG -Jinên ku li Gevera Colemêrgê Rojnameyên Azadiya Welat û Ozgur Gundemê belav dikin, têkildarî kar û xebatên xwe diyar kirin ku tenê armanca wan ewe ku gel ronî û agahdar bikin.

Çapemeniya kurd ku xwedî kevneşopiyek 120 salan e, li gel sirgûn, kuştin, girtin, binçavkirin û cezayên giran kevneşopiya xwe ya ronîkirin û agahdarkirinê didomîne. Çapemeniya kurd ku nêzî 120 sal emrê wê heye û 40 salin têkoşîna azadiyê dide, li gel hemû zext û zordariyan vê kevneşopiya xwe ya azadiyê didomîne. Çapemeniya azad ku vê kevneşopiya xwe ya azadiyê didomîne, ji aliyê gel ve jî tê parastin. Li navçeya Geverê ya Colemêrgê jinên ku di karê belavkariya Rojnameya Azadiya Welat û Ozgur Gundemê dikin, diyar dikin ku armanca wan ewe ku gel ronî bikin. Her wiha rast agahdar bikin. Belavkarên jin ên rojnameyên Azadiya Welat û Ozgur Gundemê Evin Doman û Eylem Mîlaz li ser girîngî û watiya xebatên xwe axivîn.

'Armanca em gel ronî û agahdar bikin'

Evîn Doman, anî ziman ku 4 salin li Geverê rojnameyên Azadiya Welat û Ozgur Gundemê belav dike û wiha got: "Min di 16 saliya xwe de dest bi belavkariya rojnameyan kir. Xwezî min zûdetir dest bi vî karî kiribûya. Ev karê ku ez dikim mîrate û rêya hevalên me yên di nava çapemeniyê de şehît ketine ye. Ji bo ez xwe û gel ronî, zane û agahdar bikim vî karî dikim. Em dema di nava gel de xebatê dimeşînin em rastî eleqeyek mezin ji aliyê gel ve tên û em pir xweş tên pêşwazîkirin. Têkoşîna gel hêz û hêviya me jî xurttir dike.

'Em dixwazin qîmeta şehîdên xwe bi qîmettir bikin'

Evin, da zanîn ku şehîdên wan ev mîras ji wan re hiştiye û ew dixwazin bi vî karê xwe nirxên şehîdên xwe xurtir bikin û bêtir biparêzin. Evîn, destnîşan kir ku hewce be rojnameyan bê pere li gel belav dikin û tenê bi boneya ronîkirin, zanebûn û agahdariyê rojnameyan belav dikin û wiha got: "Armanca me ewe ku em fedekariyên gel û bîrdoziyê bi hev girê bidin. Em dixwazin aliyê xwendinê yê gel jî xurt bikin."

'Dewlet zextên derûnî dimeşîne'

Evîn, destnîşan kir ku ji ber feraseta zilam car caran zahmetiyan dijîn û li aliyê din dewlet jî zextên derûnî li ser wan dimeşîne û wiha dawî li axaftina xwe anî: "Car caran polîs jî tacîza devkî li ser me dimeşîne. Di destpêka kar de min bêtir zahmetî kişand. Her dem rojname rastî cezayan dihat. Rastî astengiyan dihat. Lê niha rewşa rojnameyê û belavkariyê baştir bûye."

'Ji bo em li keda hevalen xwe xwedî derkevin em li vir in'


Belavkara Rojnameya heftane a Demokratik Ulusê Eylem Milas jî anî ziman ku wê mehek berê dest bi karê belavkariyê kir û wiha got: "Ez dixwazim keda min jî têkeve nava vê têkoşînê. Hevalên me li ser vê rêyê bedel dan û şehîd ketin. Ji bo ez li doz û têkoşîna wan xwedî derkevim min dest bi karê belavkariyê kir. Armanca min ne pere ye. Armanca min ez doz û têkoşîna wan bilintir bikim û her wiha ked û nirxên wan biparêzim."

Evîn Eylem, wekî hemû hevalên xwe yên belavkar, rojnameyên ku piştî nîvro digêjin Geverê didin ser milê xwe û li aboneyan, esnaf û welatiyan belav dikin. Yên pereyên wan tune be jî bê pere didin welatiyan.

(mae/rc)