Zaroka keç despêkê hat tecevûz kirin piştre jî avêtin kolanê
09:56
Zehra Dogan /JINHA
AMED - Zaroka bi navê B.Î a 16'e salî diyar kir ku, ew ji aliyê kesê bi navê V.M. ve tê revandin piştre rastî êrîşê tecevûzê tê û dûvre jêre dibêje 'malbata min te naxweze' û ew davêje kolanê. B.Î a ku ji aliyê malbata xwe ve jî tê red kirin got: "Cihek ku lê biçim nîne ji ber vê ez li parqê radikevim. Ji ber tirsa xwe jî min ji polîsan re rastiyê negotiye, ji ber vê yekê jî tiştek ez bikim êdî nema ye."
Li Tirkiyê heya niha polîtîkayek ku biryarên li dijî zewacên bi temenê çûk û bi zorê tê zewicandin nehatiye derxistin û ji ber vê yekê di bin navê mehra mele gelek zarokên jin tên firotin. Li Amedê zaroka jin a bi navê B.Î ya 16'e salî despêkê ji aliyê V.M ya 18'e salî tê revandin û piştre bi mehra mele ew dixapîne û dûver êrîşê tecevûzê pêktîne û davêje kolanê.
'Tiryakê hişbirê bû'
B.Î buyera jiyan kirye ji ajansa me re vegot û diyar kir ku, li bajêr buyerên wiha gelek tê jiyan kirin û wiha got: "Li taxên me buyerên jin revandin gelek tê jiyan kirin ji xwe. V.M. ji min re got 'tu ya minî' û dûvre min revand." B.Î da zanîn ku berî 7 mehan V.M bi navê heskirinê ew xapandiye û revandiye û wiha got: "Piştî ku min revand ez birim mala xwe û mehra mele birî û piştre min tecevûz kir. Di wê demê de ez rastî çi hatibûm min ne dizanî ez matmayî mabûm. Ji ber tirsa xwe min ne dikarî tiştek bêjim." B.Î da zanîn ku V.M tiryakiyê hişbirêye û her hişbirê jî difrot û wiha domkir: "Her dem esrarê bi kartanî, ji ber vê yekê min ne dikarî tiştek bêjim wî. Bavê min jî, ji ber ku hişbirê difrot hat girtin û heya niha di girtîgehê de tê girtin."
'Ez li parqê radikevim'
B.Î anî ziman ku ew ji aliyê malbatê V.M'e ve ji malê hatiye avêtine û pişt re çûye gilî li V.M kiriye û wiha pêde çû: "Piştî min gilî li wan kir V.M hate girtin. Min jî birin mala zarokan. Malbata V.M min tehdît kir û gotin nebêje 'ez zarokê wan nasdikim'. Ez jî tirsiyam ji ber vê yekê di îfadeya xwede min got 'kesê ku min revandiye ne eve'. Ji xwe çareyek min a din tune bû, pêwîst bû bi min re zewicî ba. Lê piştî wan nêzîkatiyan min jî dengê xwe nekir." B.Î anî ziman ku piştî V.M'ê ji girtîgehê derket ew ji mala zarokan derxistiye û wê radestî malbatê kiriye û wiha pêde çû: "V.M ji berpirsyarê mala zarokan re got 'êdî pêwîst nake ew li vir bimîne' û min bir radestî malbatê kir. Malbat jî ji min re got ' te namûsê me bin pêkir' û vê carê her roj ez rastî tundiya wan dihatim. Êdî min jî tehmûl nekir û reviyam ji mal. Ez li V.M geriyam ku min bigre lê bersiva wî jî 'ez nikarim te bigrim malbata min razî nabe' bû. Pişter min ne dizanî ez çi bikim û cihek biçimê jî nema. Ev bi rojane ez li parqa nav Sûrê de radikevim û kes xwedî li min dernakeve."
'Berî vê jî ez li mala zarokan mam'
B.Î da zanîn ku ew ji ber tundiya malbatê berê jî li mala zarokan maye û cihê birînên xwe nîşan kir û got: "Bavê min herdem tundiyê li min û dayika min dikir. Piştî bavê min hat girtin vê carê dayika min dest bi tundiyê li ser min kir. Ne dihêşt ez derêm derve, ji ber ez carek derketibum derve piştî hatim malê dayika min li min da û li ser dengê qîra min cîrana agahî dabun polîsan. Polîs jî hatin min birin mala zarokan û cezayê pere li dayika min birîn. Piştî demekê cardin min radestî malbatê kirin."
(rc)