Kovera Asoya Jin bi şahiyekê hat pîroz kirin
11:30
JINHA
QAMİŞLO - Ragihandina Azad a Jin li bajarê Qamîşlo salvegera yekemîn a Kovara Asoya Jin bi şahiyekê pîroz kir.
Bi pêşengtiya Raghandina Azad a Jin li Salona Rewabî a bajarê Qamişlo ya Kantona Cizîrê, salvegera yekem a Kovara Asoya Jin bi şahiyek hat pîroz kirin. Bi tevlîbûna Seroka Meclîsa Yekîtiya Star Welîde Botî, Rêvebiriya Xweser a Kantona Cizîrê Perwîn Mihemed, Rêvebira Raghandina Azad a Jin Jiyan Hêvî û her wiha Edîtora Kovara Asoya Jin Belî şahî despêkir. Hunermend Canê jî tevlî şahiyê bû û di serî de salvegera damezrandina Kovarê pîroz kir û dûvre bi dengê xwe yê zelal stran gotin.
Di berdewamiya şahiyê de Rojnemevan û damezrênera Kovara Asoya Jin Nêrgiz Ismaîl axivî û yekemîn kovara ku bi rengê jinê dihat çapkirin li Rojava pîroz kir û bi helbestekê hestên xwe li derbarê şoreşa Rojava de anî ziman.
'Armanc ewe ku şoreşek nû di nava şoreşê de avabikin'
Di heman demê de derbarê salvegera Kovarê û xebatêm wê de Edîtora kovarê Etiya Belî axivî û wiha got: ''Îro li Rojavayê Kurdistanê em salvegera yekemîn a kovara Asoya jin ku ji aliyê Ragihandina Azad a Jin ve tê çapkirin, me pîroz kir. Di serî de armanca me ya vekirina kovarê ewbu ku zanistiya jinan pêş pêşbixin û xebata jinê bidin naskirin. Kovara me bi zimanê kurdî weşana xwe dike, sedema vê yekê jî li Rojavayê Kurdistanê pêşxistina hişmendiyê zimanê Kurdi ye. Me dixwast bi avakirina Kovara Asoya jin re pêşengtî ji şoreşê re bikin û armanc ewe ku şoreşek nû di hundirê şoreşê de avakirine.''Etiya wiha domkir: ''Di destpêka çapkirina vê kovarê de gelek zehmetî hatin kişandin hem ji aliyê nivîskaran ve hem jî, ji aliyê ziman de me zehmetî jiyan kir. Li gorî demê borî niha xebatê me di asteke bilind de û bi hêz tê rêvebirin."
'Kovara Asoya Jin li dijî pergala desthilatiya mêr xwe afrand'
Li aliyekî din jî Endama Rêveberiya Ragihandina Azad a Jin Jiyan Hêvî derbarê armanca avakirina kovarê de got: ''Kovara me piranî bi zimanê kurdî weşana xwe dike. Kovara Asoya Jin li Rojava çend rolên esasî dileyize, hem pêşxistina hişmendiya jinan de rolek sereke dileyize hem jî xebat û rêxistina jin bi civakê dide naskirin." Jiyan wiha domkir: "Weke tê zanîn heya roja îro jin di nava pergalê de li gorî zilam hatiye pênasekirin. Kovara Asoya jin li dijî pergal û hişmendiya mêr xwe avakir û hemû têkoşîna Kovarê ewe ku rengê jin ronî bike, bi nasnameya jin jinê bide naskirin û heqîqeta jinê binvîse."
'Xwedî li Kovarê derketin xwedî li nasnameyê jin derketine'
Jiyan behsa asta ku îro jina kurd gihêştiye kir û wiha pêde çû: ''Asta ku îro kovara Asoya Jin gihîştiye astekî pîroze, ji bo jinên ku di civakê de heyî bide naskirin û asta wan a zanebûnê bilintir bike, xebatkarên wê roleke wiha girtine ser milê xwe û bi vê berpirsyartiyê tevdigerin.'' Jiyan wiha dawî li gotin xwe anî: ''Bi bi armanca salvegera yekemîn a Kovara Asoya Jin, em li hemû xebatkarên wê pîroz dikin û ji tevahiya jinan re dibêjin bila hemû jin xwedî li kovara xwe derbikevin. Ji ber xwedî derketina li Kovarê xwedî li derketina nasnameya xwe ye."
Hevseroka Partiya Guhartina Demokratîka Kurdistan Mizgîn Zêdan nêrîna xwe wiha vegot: ''Em salvegera kovarê pîroz dikin. Bi rastî Kovara Asoya Jin rengekî gelek xweş daye xebata Rojava ya jinê û hêviya me ew e ku pêşketinên zêdetir di xebatên xwe de pêkbînin.'' Di dawî de dayîka bi navê Mûnîra Şamîl jî salvegera damezrandina Kovara Asoya Jinê li hemû jinan û li Rêberê Gelê Kurd Abdullah Ocelan pîroz kir û daxweza serkeftinê ji xebatkaran re kir.
Şahî bi birîna pastê û bi durişmeya "Jin jiyan azadî" bi dawî bu.
(px/rc)