JINHA

AMED - Li navçeya Erxenî ya Amedê bi pêşengtiya KJA'yê ji bo balê bikşine şiddeta jinê meş hate li dar xistin. Parlamentera HDP'ê Nursel Aydogan li vir axaftinek kir û da zanîn ku jin ne namusa tû kesî ye û got: '' Namusa me azadiya me ye.''

Li navçeya Erxenî ya Amedê di pêşengtiya KJA 'yê de ji bo balê bikşînin ser şîddeta jinê û bi taybetî jî ji bo protestokirina êrîşên li hember Mutlu Kaya û Hacer Aladag meş hate li dar xistin. Meş bi tevlûbûna parlamentera HDP'ê Nursel Aydogan, Hevserokê Şaredariya Erxenî Ramazan Kartalmış, rêveberên HDP û DBP û bi sedan welatî ji ber komeleya SELİS'ê destpêkir. Jin bi pankarta '' Em li hember serdestiya mêr qetilkirina jinan û cînayetên baviksalarî dimeşin'' heta parka Sakîne Cansiz meşiyan. Di meşê de wêneyên Sakine Cansız, Kader Ortakkaya, Hacer Aladağ, Özgecan û ya Mutlu Kaya jî hate rakirin. Jinan her tim diruşmên 'jin jiyan azadî' ' destê li jinê radibe bila bişkê' 'ne jinê zihniyeta xwe ya nêrî bikujin' û qatlîma jinê heye, deng bide' hate avêtin. Piştre daxuyani hate xwendin. Di daxuyaniyê de endamê KJA'yê Dûrdane Peker bal kişand tundiya li hember jinê û diyar kir ku her roj herî kêm 5 jin tê qetilkirin û dewlet li hember vê bêdengiya xwe didomîne û bi biryarên 'rewşa baş', ' daxistina tahrîkê'cesaret dide kujeran. Dûrdane wiha berdewam kir:'' Herî dawî li navçeya Erxenî ya Amedê du jin rastî êrîşa mêran hat. Yek ji wan Hacer Aladag ji alî hevsera xwe bi qabloyê hate xeniqandin Mutlu Kaya jî di encama êrîşa çekdarî de, bi giranî birîndar bû û hê jî li nexweşxanê ber xwe dide.''

Dûrdane dest nîşan kir ku di her du buyeran de jî sucdar ne tenê kesên êrîşkar in lewre pêkûtiyên civakî, ne hilbûna saziyên dewletê û nêrîna li hember jinê jî dibe sedema qetilkirina jinan û got: '' Di makezagonê dexalên ji bo wekheviya jin û mêran heye lê Serokkomar dibêje' wekheviya jin û mêran berovajiya fıtratê ye'. Ev her tiştî derdixine holê.'' Di dawiya daxuyaniyê de daxwaza hêviya cîhanek bê tundiyê hate kirin û piştre parlamentera HDP'ê Nursel Aydogan axivî û bal kişand tundiya li hember jinê û diyar kir ku di qetilkirina jinan de zêdebûnekî bêhempa heye û got: '' şiddet û qetlîamên ku li hember jinê pêk tê politik e. Nêzîkatiyên polîtik û kevneşopî û nayê qebûl kirin.'' Nursel da zanîn ku jin tu carî nebû namûsa mêran û axaftina xwe wiha bi dawi kir: '' Namusa me azadiya me ye û heta em azadiya xwe bi dest bixînin em ê têbikoşin.''


(ch/rc)