Newroz Dijwar/JINHA

HEWLÊR - Parlementerên jin yên Goranê ku di komisyona zagona nû ya Herêma Federala Kurdistanê de cîh digirin diyar kirin ku dê di zagona nû de newekheviya nava civakê nîqaşbikin û kotaya jinan biguherînin.

Nirxandinên ser zagona nû demdirêje li Herêma Federala Kurdistanê berdewam dikin gihiştin xaladawiyê. Komisyona ji 21 kesan hatî diyarkirin dê çiqas kursî bigihin kijan partiyê diyarkirin. Ji PDK 6, Goran 4, YNK 4, Komele 1, Yekgirtu 2, ji xiristiyan û tirkmenan jî 1 endam dê di komisyonê de cîh bigirin. Partiyan di nava xwe de endamên xwe net kirin, lê di nava komisyonê de kêmbûna jinan balê dikişîne. Li gorî vê ji PDK'ê 1, Goran 2 û ji hilristiyanan jî 1 bi giştî 4 parlementerên jin cîh girtin.

'Bawerî bi jinan nayîne'

Parlementerên jin yên Goranê yên ku dê di komisyonê de cîh bigirin Kostan Mihemed û Bahar Mahmud dê çawan di nava komisyonê de cîh bigirin nirxandin kirin. Ji parlementeran Kostan Mihemed da zanîn ku di komisyonê de cîh girtina 4 jinan ew kêm dibînin û got: "Em di nava civakeke bi hişmendiya mêran de dijîn. Hîna ramana tenê mêr dikarin di siyasetê de cîh bigirin û civakê bi rêve bibin serwere. Ji ber wê jî cîh nade jin di qadên civakî de cîh bigire. Yan jî cihek bi sînor dide jinan, ji ber baweriya wan bi jinan nîne."

'Em bi rêxistinên jinan re hatin bahev'

Kostan destnîşan kir ku ji derveyî komisyonê wan ji rêxistinên civakî û rêxistinên jinan raman girtine û wiha domand: "Berî hina em bi rêxistinên civakî û rêxistinên jinan re hatine bahev. Me ji wan amadekirina pêşniyar nameyek ya biçe parlementoyê xwest. Ez bawerdikim ku dê ev daxwaz di nava zagonan de cîh bigire. Di nava komisyonê de em 4 jinin. Em dixwazin ku di van mijaran de alîkariya mêran jî ji bo me bibe. Ez ji komisyona heyî jî bawerdikim. Em dixwazin hemû daxwazên jinan bînin cîh. Em bawerdikim ku dê komisyon di vî aliyî de bixebite."

'Ji hemû kesiman beşdariya komisyonê giringe'

Ji Parlementeran Bahar Mahmud anî ziman ku ji hemû kesiman beşdariya komisyonê giringe lê jin di navê de kêm cîh girtine û wiha berdwam kir: "Li gora min di komisyonê de çiqas kes hebin dê ewqas jî başbe. Ez bi çavê mirovî dinêrim. Weke partî ji 4 endaman me du jin nîşandane. Me dixwest ku partiyên dinê jî hinek di vî aliyî de bi baldarî nêz bibin. Lê ev qas jî ji qet tevlînebûnê ez giringtir dibînim."

'Emê koteya jinan biguherîn'

Bahar bilêv kir ku dê di nava komisyonê de tayîbetî ji bo koteya jinan nirxandinan bikin û biriyarên giring bidin û wiha dom kir: "Weke mînak dikare koteya jinan di parlementoyê de bê nîqaşkirin. Divê mijarê de divê em biriyar bidin. Em jinên kurdin. Dema ku em tenê alîkariya biriyarên ser jinan bikin rast nayê dîtin. Em naxwazin weke hijmar li zagonan binêrin. Ji xwe hijmara me diyare. Di vê mijarê de baweriya me bi parlementerên me yên mêr jî tê. Di guherîna zagonên ser jinan de dê alîkariya me bikin. Dema ku zagonek demokratîk bê amadekirin dê zêdetir ji bo mafê mirovan û azadiyê xizmetê bike. Tayîbetî jî divê koteya jinan bê nirxandin. Niha di nava hikumetê de tenê jinek cîh digire. Em weke jin dixwazin di nava siyaset û civakê de zêdetir cîh bigirin, ji ber wê jî divê hinek guherînê bên kirin."

(zt)