JINHA

NAVENDA NÛÇEYAN - Li Amedê û Êlihê di hefteya 329'emîn de jî xizmên windayan hatin bahev û dad xwestin. Li Cizîrê jî Dayîkên Şemiyê çalakiya xwe ya heftane pêkanîn.

Dayîkên Şemiyê yên navçeya Cizîra Şirnexê çalakiya xwe ya hefteya 336'an li Kolana Hunerê li dar xistin. Di çalakiyê de wêneyên kesên hatin qetilkirin û windakirin hilgirtin. Di çalakiyê de aqubeta Huseyîn Teymurtaş ê ku di 1986'an de li Şirnexê gazîkirin qereqolê û careke din agahî jê nehatin girtin pirsîn. Endamê Şaxa MEYA-DER'ê yê Cizîrê Veysî Durgut çîrokva Huseyîn Teymurtaş vegot û wiha got: "Huseyîn Teymurtaş ji aliyê leşkerên hatin gundê Hetmanê yê navçeya Basa a Şirnexê bi cih bûn bangî dibistanê kirin û li wir hat binçavkirin û 15 rojan rastî îşkenceyê hat û pişt re serbest berdan. Leşkeran destûr neda Teymurtaş bê deramankirin jî. Huseyîn 15 roj şunda careke din bangî qereqolê kirin û careke din tu agahî jî wî negirtin. Ligel malbatê serî li gelek cihan da tu agahî jî Huseyîn negirtin û bi salane hestiyên wî jî peyda nekirin."

ÊLIH

Di hefteya 329'emîn de bi duruşma "Winda bên dîtin û faîl bên darezandin" li ber Bîrdariya Mafê Mirovan ya ser Cadeya Gulîstanê Şaxa ÎHD a Êlihê û xizmên windayan hatin bahev û çalakiya xwe pêkanîn. Serokê Şaxa ÎHD a Êlihê Mehmet Bagadir çalakiyên xizmên windayan yên ku berî niha 20 salan bi 30 hesan li Stenbolê despêkirî bi bîrxist û got: "Xizmên windayan û Dayîkên Şemiyê bi salanin tekoşîna xwe berdewam dikin. Gelek bûyerên dinê yên weke van hatin jiyandin."

AMED

Şaxa ÎHD'ê ya Amedê û xizmên windayan çalakiya xwe ya hefteya 329'an li ber Bîrdariya Mafê Jiyanê ya Parqa Koşuyoluyê li dar xistin. Rêveberên ÎHD'ê, Dayîkên Aştiyê, xizmên windayan û parêzvanên mafên mirovan tevlî çalakiyê bûn. Di çalakiyê aqubeta du xwîşkên hev Mumîne û Tayyîbe Sîncar ên li gundê Guzel Agaç ê Midyadê di sala 1994'an de ji aliyê tîmên taybet ve hatin qetilkirin pirsîn û xwestin kiyar bên cezakirin. Rêveberê ÎHD'ê yê Amedê Abdullah Zeytun, diyar kir ku bi salane xizmên windayan ji bo hesaba windayan bipirsin destê wan di stuyê dewlet û hikûmetê de ye û heya encamê negirin dest jê bernadin. Abdullah anî ziman ku di mijara gav avêtinê de hikûmet bêdeng in û hem tim kiryar hatin veşartin û hatin xelatkirin.

Pişt re Rêveberê ÎHD'ê yê Amedê Mahsun Kaya çîroka du xwîşkên hev Mumîne û Tayyîbe Sîncar vegot. Mahsun, hevpeyvîna dayîka Mumîne û Teyyîbe Sîncar yên ku di 15'ê tebaxa 1994'an de di Rojnameya Ozgur Gundemê de derket wiha vegot: "Di 27'ê hezîranê de tîmên taybet derketin operasyonê û bi ser mala me de girtin. Ez bi keça xwe re li ser ban raketibûm. Serdagirtin li hemberî keça min Tayyîbeyê hatibû kirin. Çekên xwe dirêjî keça min kirin. Di wê demê de keça min a din xwe avêt ser xwîşka xwe. Tîmên taybet her du keçên min gulebaran kirin û qetil kirin. Piştî bûyerê leşker hatin gundê me xwestin cenazeyan defin bikin. Lê me destûr nedanê. Em dozger xwest cihê bûyerê. Ji navçeya Mehsertê dozger hat. Li cihê bûyerê 36 qalikên guleyên M.16 tesbît kirin. Ligel hemû daxwazên me dozgeriyê otopsî nekir. Leşkeran di heman rojê de keyayê gundê Mehdî Aksoy binçav kirin û piştî 30 seat şunda serbest berdan. Fermandarê li ser serê leşkeran hat gundê me got, 'Heke we cerdevanî qebûl kiriba ev yêk nedihate serê we'"


(za-ma/zt)