JINHA

KOBANÊ - Di civîna li gundê Şêran yê Kobanê hat li darxistin de Hevseroka PYD'ê Asya Ebdullha jî beşdar bû û diyar kir ku berxwedana destaniya YPG û YPJ'ê siyaseta Rojhilata Navîn guherand.

Di çarçoveya kar û xebatên Partiya Yekîtiya Demokratîk (PYD) de, li gundê Şêran a rojhilatê bajarê Kobanê civînek hate lidarxistin. Di civînê de Hevseroka PYD’ê Asye Ebdullah û bi dehan şêniyên gundê Şêran û gundên derdora wê amade bûn. Civîn bi deqeyeke rêzgirtinê dest pê kir. Piştre Asye Ebdullah derbarê rewşa siyasî ya dawî li herêmê nirxand û bal kişand ser serkeftinên şervanên YPG’ê û YPJ’ê di berxwedana li dijî çeteyên DAIŞ’ê û got: “Berxwedana ku li Kantonên Cizîrê û Efrînê tê meşandin paratina hemû pêkhateyan ji metirsiya pişaftinê armanc dike. Bi saya vê berxwedanê siyaseta cîhanê li hemberî Rojhilata Navîn hate guhertin û hemû pilanên qirêj ên li dijî pêkhateyên herêmê vala derxistin.”

Asye Ebdullah got ku Rêveberiya Xweseriya Demokratîk ku niha li her 3 kantonên Rojavayê Kurdistanê tê meşandin, nûnertiya hemû gelên herêmê yên Kurd, Ereb, Asûr, Suryan û Ermen dike. Asye destnîşan kir ku ew wek PYD di çarçova parastina mafên hemû gelan de amade ne bi hemû aliyan re diyalogê bikin û çareseriyekê ji aloziya Sûriyeyê re peyda bikin û wiha domand: “Hevdîtinên me yên dîplomasî bi hemû partî, rêxistinên siyasî û rêxistinên jinan ên Ewropî re jî di vê çarçoveyê de berdewam in. Em hewl didin rastî û rewşa ku Sûriyeyê têre derbas dibe bi gihînin hemû aliyên cîhanê. Armanca me ya sereke avakirina civakeke demokratîk û azad e.”

Di dawiya civînê de Asye pirsên beşdaran yên di derbarê rewşa siyasî ya giştî de bersivandin.

(zt)