JINHA

QAMIŞLO – Di şewata li Navenda Tenduristiyê ya Taxa Meyselûn a Qamişlo derket de, gelek kesan jiyana xwe ji dest dan û birîndar bûn.

Li avahiya Navenda Tenduristiyê ya li Taxa Meyselun ya bajarê Qamişlo ku ji 7 odeyan pêk tê şewat derket. Li gorî agahiyên destpêkê cereyê gazê yê li mitbexê teqiya û şewat derket. Di şewatê de cereyên oksîjenê jî teqiyan, lewre şewat li tevahiya avahiyê belav bû. Piştî ku şewat hemû avahî dorpêç kir, depoya mazotê ya li ser banê avahî jî teqiya. Piştî ku şewat destpê kir hêzên asayişê û ekîbên agirvemirandin çûn cihê bûyerê û şewat vemirand. Her wiha bi sedan malbat û xizmên kesên di avahiyê de jî çûn ber navenda tenduristiyê.

Li gorî agahiyên ku hîn nehatine teyîtkirin, di avahiyê de nêzî 50 kesî hebûn û di encama şewatê gelek kesan jiyana xwe ji dest da û gelek jî birîndar bûn. Kesên birîndar rakirin nexweşxaneyên Selam, Nûr, Nafiz, Wetenî û Rehmê yên li Qamişlo. Cenazeyên kesên jiyana xwe ji dest dane jî rakirin nexweşxaneyan.

(zt)