JINHA

ENQERE- Ekîn Ceren Dogruak (Amara) a ku li Herêma Federal a Kurdistanê di qezaya trafîkê de jiyana xwe ji dest dabû di salvegera şehadeta xwe de bi beybûnên ku gelek jê hez dikir hate bibîranîn.

Ekîn Ceren Dogruak (Amara) a PKK’î ya di 31’ê Gulana 2005’an de li Herêma Federal a Kurdistanê di qezayê de jiyana xwe ji dest da; di 10’emîn salvegera şehadeta xwe de li ser gora xwe ya Karşiyaka ya Enqereyê hate bibîranîn. Bavê Amara Nurset Dogruak, dayika wê Hulya Dogruak, Rêxistina HDP’ê ya Enqereyê, Komeleya elewiyan a Demokratîk û Meclîsa Dayikên Aştiyê jî di nav de gelek kes beşdarî merasîma bîranê bûn.

Ligel ku li ser qezayê 10 sal derbas bû jî dayuk û bavê wê weke roja yekem êşa keça xwe dijîn û bi van hestan îsal jî hatin ser gora keça xwe. Kesên hatin bîranînê beybûnên ku Amarayê gelek jê hez dikir danîn ser gora wê. Merasîma bîranînê bi rêzgirtina ji bo kesên di têkoşîna azadî û demoksariyê de jiyana xwe ji dest dane dest pê kir.

Bêyî Amara 10 sal derbas bûn

Bavê Amarayê Nusret Dogruak li ser gorê axaftineke kurt kir û wiha got: “Îro deh sal derbas bûn ku me keça xwe şandiye stêrkan. Ev 10 salin we qet em tenê nehîştin. Ne tenê îro me her roj we li cem xwe hîs kir, we hemû derd, şadî û fikarên me parve kir. Ez ji we hemûyan re spas dikim.”

Merasîma bîranînê piştî ku dayik û bavê Amarayê kevirê gora keça xwe maçê kirin bi dawî bû û kesên beşdarî bîranînê bûn, ji goristanê veqetiyan.

(sa/mae)