JINHA

BEHDÎNAN - Hevseroka Konseya Rêveber a KCK'ê Besê Hozat da xuyakirin, ku hemû hêzên qetlîamker û yên destekê didin polîtîkayên komkujiyê yên li Kurdistanê û Tirkiyeyê di hedefê de ne û bang li rewşenbîr û hêzên demokratîk kir, ku xwedî li xwerêveberiyên Kurdan derkevin. Besê destnîşan kir ku êrîşa li dijî avahî û cihên AKP'ê rewa ne û got, "Tişta li hemberî vê komkujî û qirkirina dijwar were kirin, li her cihî bilindkirina berxwedan û têkoşînê ye."

Hevseroka Konseya Rêveber a Koma Civakên Kurdistanê (KCK) Besê Hozat, di bernameya 'Polîtîk Alan' MED NÛÇE de axivî û da zanîn ku di rewşa heyî de zext û faşîzmeke giran li ser civaka Tirkiyeyê heye. Besê diyar kir ku tevî rojnamevan û aktîvîstên mafên mirovan bi hezaran kes ji ber pêkanînên kêfî yên hikûmeta AKP'ê hatine girtin û got, "Li Kurdistanê faşîzm hebe, li Tirkiyeyê demokrasî nabe. Ji xwe tê dîtin, ku nabe. Niha li ser civaka Tirkiyeyê polîtîkayeke giran a zext û melisandinê heye. Di heman demê de zext û sansureke dijwar li ser çapemeniyê heye. Rojnamevan û aktîvîstên mafên mirovan tên girtin. Mirovên di asta herî lîberal de diaxivin, têdikoşin û nerazîbûna xwe nîşan didin tên girtin, rastî gef û lîncê tên. Mirov nikarin bi awayekî azad bijîn."

'Li gelemperiya Tirkiyeyê faşîzma AKP'ê heye'

Besê destnîşan kir ku heta polîtîka înkar û tinekirinê ya li ser Kurdan bidome, wê faşîzma li Tirkiyeyê ti carî bi dawî nebe, zext û pêkanînên antî-demokratîk ên li ser civakê her hebin û bal kişand ser vê xalê: "Rewşa ku niha diqewime ev e. Li Kurdistanê jî li Tirkiyeyê jî faşîzm heye. Heman pêkanîn bi rê û rêbazên cuda bi cih tên anîn. Li Kurdistanê, ji ber ku Kurd li dijî vê li ber xwe didin û têdikoş in, rastî zext û komkujiyan tên. Lê belê, ji ber ku li Tirkiyeyê li pêşberî van polîtîkayan rewşeke bêdeng û melisandî heye, ev polîtîka bi hêsanî tên meşandin. Lewma ev bêdengî çiqasî bidome, wê faşîzm dijwartir û xurttir bibe. Yekane rêya şikandina vê yekê, berxwedan e."

'Înfaz û komkujiyên fizîkî wê belav bibin'

Besê da zanîn ku êrîş û komkujiyên li Kurdistanê li hemberî berxwedanên xwerêveberiyê tên kirin, wê bi tenê li Kurdistanê nemînin, xeterî heye ku li gelemperiya Tirkiyeyê belav bibin û got, "Ev komkujî û qirkirinên îro li Kurdistanê tên kirin, di demeke kurt de wê li Tirkiyeyê jî bikevin rojevê. Ev zext wê li hemberî komên çand û baweriyên civakî, mirovên lîberal, laîk û beşên cuda yên civakî, bên kirin. Dibe ku înfaz û komkujiyên fîzîkî jî rû bidin. Yanî ev rewşa li Kurdistanê wê bi tenê li Kurdistanê nemîne."

'Girîng e li metropolên Tirkiyeyê ciwan rabin ser piyan'

Hevseroka Konseya Rêveber a KCK'ê Besê Hozat bang li Kurdên li metropolên Tirkiyeyê dijîn kir û destnîşan kir, ku divê AKP'ê û hemû hêzên destekê didin AKP'ê hedef bên girtin. Besê ev bang li Kurdan, bi taybetî jî ciwanên li metropolên Tirkiyeyê dijîn kir: "Girîng e bi mîlyonan Kurdên li metropolên Tirkiyeyê dijîn rabin ser piyan û îsyan bikin. Divê Tirkiyeyê bikin qada şewatê. Pêwîste ciwanên Tirk û ji komên din ên etnîkî jî bi heman rengî rabin ser piyan. Hem li Kurdistanê hem jî li Tirkiyeyê. Êrîşa li hemberî cih û avahiyên AKP'ê rewa ye. Lewma, divê her cihên AKP'ê bên şewitandin û hilweşandin. Hêzên qetlîamker û hemû hêzên destekê didin van polîtîkayên komkujiyê yên li Kurdistan û Tirkiyeyê di hedefê de ne. Ev yek mafê parastina rewa yê Kurdan û ciwanên Kurd e. Tişta li hemberî vê komkujî û qirkirina dijwar were kirin, li her cihî bilindkirina berxwedan û têkoşînê ye. Ji ber vê yekê dibêjim ku gelê Kurd, dostên wan û hemû hêzên demokratîk ên li Kurdistan û Tirkiyeyê dijîn, rabin ser piyan û xwedî li vê berxwedanê derkevin."

'Komkujiyên îro dewama Mereşê ne'

Besê di 37. salvegera komkujiya Mereşê de, mirovên di komkujiyê de jiyana xwe ji dest dan bibîr anî û axaftina xwe bi vî rengî dewam kir: "Komkujiya Mereşê, komkujiyeke welê ye ku divê ji gelek aliyan ve bê nirxandin. Komkujiyên niha dewam dikin, dewama komkujiya Mereşê ne. Ev komkujî jî dewama komkujî û polîtîkayên qirkirinê yên sed sal in li hemberî Kurdan tên kirin e."

'Rêya pûçkirina polîtîkayên komkujiyê, tevlîbûna li têkoşîna azadiyê ye'

Besê ragihand, ku komkujiyên bi heman rengî îro jî bi rengekî dijwar dewam dikin û destnîşan kir, ku mîna komkujiya Mereşê, wê îro jî dewleta Tirk bi ser nekeve. Hevseroka Konseya Rêveber a KCK'ê bibîr xist, ku bi komkujiya Mereşê re ji bo Kurdên Elewî berê xwe nedin nava refên PKK'ê hatine koçberkirin û anî ziman ku Kurdên Elewî li metropolên Tirkiyeyê û Ewropayê jî xwe gihandin PKK'ê û bi vî rengî armancên dewleta Tirk pûç kirin.

Besê da xuyakirin, ku polîtîkaya komkujiyê ya îro tê meşandin jî, bi vî rengî dikare bê pûçkirin û got, "Rê û rêbazên vê diyar in. Tevlîbûna li nava têkoşîna azadiyê û meşandina têkoşînê ye. Bi vî rengî, polîtîkayên qirkirina çandî dikarin bi temamî bên pûçkirin. Ji bo vê, divê xwedî li ziman, çand û nirxên neteweyî bê derketin û bên jîndarkirin."

(rc)