JINHA

NAVENDA NÛÇEYAN - Koordînasyona KJK'ê da xuyakirin, ku li hemberî êrîşên AKP'ê yên ji bo bênasname û bêstatu hiştina gelê Kurd, gel bi hemû derfetên xwe li ber xwe dide û wiha bang li jinan hat kirin: "Rêya yekane berxwedan e. Eger jiyan wê hebe, divê bi azadî be. Yekane rêya jiyana azad, berxwedan e. Li ser vê bingehê em bang li tevahiya jinên Kurd dikin ku di asta pêşengiyê de di nava têkoşîna avakirina jiyana azad de cih bigirin û berxwedanê mezin bikin."

Koordînasyona Komalên Jinên Kurdistanê (KJK) daxuyaniyeke nivîskî weşand û destnîşan kir ku armanca yekane ya pêla êrîşên tên kirin, teslîmgirtina gelê Kurd e. Di daxuyaniya Koordînasyona KJK'ê de hat gotin, "Şerê ku hikûmeta AKP'ê li hemberî gel û tevgera me îlan kiriye, gav bi gav kûrttir dibe. Dewleta hikûmeta AKP'ê ya dixwaze gelê Kurd bêstatu û bênasname bihêle, li hemberî pêngava avakirina jiyana azad a gelê me ku li dijî vê siyaseta înkar û tinekirinê daye destpêkirin, hemû alav û amûrên xwe xistiye nava tevgerê. Yekane armanca AKP'ê bêvîn hiştin, bênasname hiştin, qutkirina ji têkoşînê, bêstatu hiştin û teslîmgirtina gelê Kurd e. Ji ber vê yekê ye li herêmên xwerêveberiya vîna rêxistinbûyî ya gelê Kurd heye, ewçend bi dijwarî êrîş dike. Hemû hincetên bilêv dikin, derew in. Armanca bi tenê; teslîmgirtina gelê Kurd e."

KJK'ê da zanîn ku AKP bi dorpêçkirina navçeyên Kurdistanê re û bi komkujiyan re dixwaze Kurdan bimelisîne û got, "AKP a ku li hemberî berxwedana dîrokî ya gelê me ti encam bi dest nexist, gav bi gav hêzeke zêdetir teqwiye dike û hemû çekên di destê xwe de li hemberî gel bi kar tîne. Divê baş were zanîn ku yê şer derbasî nava bajaran kiriye, ne tevgera me ye, dewlet bi xwe ye. Ji bo teslîmgirtina vîna gelê me, AKP'ê tang xistiye nava bajaran. Gelê me, li hemberî vê namerdiya ku kêm caran di dîroka cîhanê de hatiye dîtin, berxwedaneke mûezem û dîrokî nîşan dide. Vê berxwedanê ji niha ve navê xwe bi tîpên zêrîn di dîroka berxwedanê ya cîhanê de nivîsandiye. AKP'ê jî di dîroka gerdûnî ya namerdiyê de bû rûpelekî lenetbûyî û wê di çalak kolandiye de ji sedî sed bifetise."

'Tevgera me, ji bilî jiyana azad ti alternatîfê nas nake'

KJK'ê da xuyakirin ku têkoşîna azadiyê ya Kurd, ji bilî jiyana azad ti alternatîfekê nas nake û wiha dewam kir: "AKP a ku zîhniyeta faşîst a Tirk di roja îro de hildigire û bi cih tîne, mîrateya Darbekariya 12'ê Îlonê û dewleta şerê gemarî yê salên 90'î daye ser pişta xwe û mêtîngeriya Tirk rojane dike. Gelê me ji bilî jiyana azad ti alternatîfê nas nake û bi pêşengiya tevgera me re di nava 40 salên têkoşîna azadiyê de di her gavê de mezin bûye û bêhtir bûye xwedî biryardariya serketinê. Şerê topeykûn ê li hemberî gelê me hatiye îlankirin, di heman demê de rojanebûyîna mêtîngeriya Tirk e. Di serî de li Sûr, Cizîr, Silopiya, Nisêbîn û Kerboranê, qaşo qedexeyên derketina derve yên li Kurdistanê, ji bilî dagirkeriyê nayê ti wateyê. Tîmên JÎTEM-DAIŞ 'ên AKP'ê ku jê re Esedûllah tê gotin, tevî Polîsên Tevgera Taybet, li ser dîwarên kolanên dagir kirine, her wiha li textên dibistanan ên veguherîne biryargeha leşkerî, vê rastiya xwe dinivîsînin. Lê belê divê baş were zanîn ku mêtîngeriya Tirk mehkûm e li Kurdistanê têk biçe.

Di civîna MGK a Cotmeha bihurî de biryara şerê topyekûn li hemberî gelê me hat wergirtin û di çarçoveya vê biryarê de bi komkujiyan re teslîmiyet li ser gelê me tê ferzkirin. Bi tenê di nava meha Kanûnê de zêdeyî 40 mirovên me hatin qetilkirin. Beşeke girîng a ji van mirovên me, jin in. Dewlet, jina berxwedêr hedef digire. Yekser êrîşî xeta xweparastinê ya jinê dike. Bi vî rengî dixwaze berxwedana bi pêşengiya jinê bişikîne."

'Jin wê bi Bêrîtanî li ber xwe bidin'

Koordînasyona KJK'ê di dewama daxuyaniya xwe de diyar kir ku weke Tevgera Azadiyê ya Jinên Kurd ew ê di pêngava rizgariya demokratîk û avakirina jiyana azad a gelê Kurd de rola xwe ya pêşengiyê ji niha û pê ve jî bi cih bînin û got, "Jinên Kurd wê li hemberî ferzên teslîmbûyînê yên dewletê ti carî serî netewînin û em ê agirê berxwedanê geş bikin. Li ser bingeha dilsoziyeke mezin a bi bîranîna şehîdên me yên xwerêveberiyê, em ê berxwedanê bi ser bixînin û hesab bipirsin. Divê AKP zanibe, ew ê hesabê van sûcên xwe yên li dijî mirovahiyê bide. Bi berxwedana Apoyî ya bi Mazlûmî, Bêrîtanî, Zîlanî ji aliyê gel û tevgear me ve tê meşandin re, ji niha ve hesab ji dewleta Tirk a faşîst tê pirsîn. Li dijî teslîmiyetê, têkoşîna parastin û avakirina jiyana azad a li ser bingeha rastiya 'berxwedan jiyan e, jiyan berxwedan e' tê mezinkirin, wê ji sedî sed bi ser bikeve. Ji bilî vê yekê em ti rêyê nas nakin. Rêya yekane berxwedan e. Eger jiyan wê hebe, divê bi azadî be. Yekane rêya jiyana azad, berxwedan e. Li ser vê bingehê weke Koordînasyona KJK'ê em bang li tevahiya jinên Kurd dikin ku di asta pêşengiyê de di nava têkoşîna avakirina jiyana azad de cih bigirin û berxwedanê mezin bikin."

(rc)