JIHNA

STENBOL - Cenazeyên Şirîn Oter û Yelîz Erbay ên ku şevê din li Stenbolê hatibûn înfazkirin, wê piştî merasîma li Taxa Gazî pêk were bên defin kirin. Jinên Gazî banga xwedî li Şirîn û Yelîz derketinê kirin û gotin, "Li Kurdistanê her roj jin tên qetilkirin û li Stenbolê 4 bûyerên înfazê pêk hatin. Zîhniyeta ku dibêjê li jinan bidin, komkujiyan pêk tîne."

Şevê din li Stenbolê, polîsên Tirk avêtin ser maleke li kolana 1149 a taxa Karadenîz yê navçeya Gazîosmanpaşayê û du jinên şoreşger ên bi navê Şîrîn Oter û Yelîz Erbay qetil kirin. Hat îdîakirin ku di bûyera li qatê duyemîn ê daîreya apartmanê de şer derketiye, lê belê li cama xanî bi tenê şopa du guleyan heye. Şahîdên bûyerê gotin, "Pevçûn tune bû, li bacayê tenê şopê du gule hebûn. Herdu jin jî birîndar bûn lê polîsan qetilkirin." Şahîdê bûyerê her wiha diyar kirin ku berî bûyerê bi çend saetan valakirina kolanê vê qetilkirinê piştrast dike.

Piştî karên otopsiyê yê Saziya Tipa Edliyê wê cenazeyên Şirîn û Yelîz bibin Taxa Gazî û piştî merasîmê wê bên definkirin. Jinên Gazî banga xwedî li Şirîn û Yelîz derketinê kirin û anîn ziman ku kiryarên pêk tên înfazên bê doze.

Duriye Sezgîn wiha got, "Zîhniyeta ku dibêjê li jinan bidin komkujiyan pêk tîne. Li Kurdistanê her roj jin tên qetilkirin û li Stenbolê 4 bûyerên înfazê pêk hatin. Di çerçoveya şerê derûniyê de di serî de jin digrin hedefê xwe." Duriye da zanîn ku di vê çerçoveyê de bang li tevahî jinan dike û wiha got, "Ez bang li tevahî jin û gel dikim ku bên û li Taxa Gazî xwedî li Şirîn û Yelîz derên."

Yildiz Gerçek jî got, "Divê gelê Gazî hemû rabe ser piyan. Bila hêrsa dayîkan kolanan dagre. Divê tevahî gelê me rabe û em şehîdên xwe bi serbilindiyek oxur bikin."

(rc)