Handan Tufan/JINHA

İZMİR - Jinên li Îzmîrê dijîn bertek nîşanî qirkirinên li Kurdistanê tên kirin dan. Jinan diyar kirin ku êdî kêr hestî derbas kiriye.

Di serî de Sur û Cizîr li gelek deveran dibin dorpêçan de êrîşên giran ser gel hene, li hember êrîşan jî her diçe berxwedana gel mezin dibe. Jinên li Îzmîrê dijîn bertek nîşanî qirkirinên li Kurdistanê tên jiyankirin dan. Jinan dan zanîn ku bi sed salane qirkirin berdewam dikin û silav ji bo qadên berxwedanê şandin. Ji jinan Hamdiye Altun destnîşan kir ku bi salan berê leşker ketine nava gundê wan û zora bûyîna cerdevan li wan kirine û wiha got: "Ji ber ku me cerdevanî ne pejirand du car gundê me şewitandin. Ji ber ku em nebûn cerdevan em neçar man ku gundê xwe biterikînin. Gundê me 10 salan vale ma. Tenê ne gundê me bi sedan gund hatin valakirin. Ev bi sedan sale em bi vê zilma dewletê re dijîn."

Hamdiye bilêv kir ku ew di aştiyê de bi israrin û wiha domand: "Me mafê xwe yê demokratîk bi kar anî û em ketin hilbijartinê, em bi ser ketin. Lê Erdogan bi vê serketina me dîn bû û şer da despêkirin. Li her devera Kurdistanê qirkirinan dike. Temenê min 60 e. Heya niha min li Tirkiyê qedexeya derketina kolanan a ewqas dirêj nedîtiye. Êşên gelê kurd hatiye rewşa êdî nayên jiyan kirin. Êdî bese, kêr negihaye hestî êdî hestî derbas kiriye. Ji 7 heya 70 salî kurdan qetildikin. Netenê zarok dayîk jî tên qetilkirin. Leşkerên Erdogan bûne parçeyên agir û ketine qadan. Erdogan xwînê dixwe. Mirina me birçîbûna wî derbas dike. Ticarî mirin xweş nîne. Bila Erdogan û derdorên xwe vê bizanin mirovan ji vê rewşa xirb derxînin. Mirin êşê dide her kesê. Diyare ku mirin êrê nade Erdogan û derdorên wî ji bo wê ye hîna qetilkirinan berdewam dike. Lê tiştek ji bîr kiriye, ticarî kurd naqedin. Deh sal jî derbasbibin emê bi van qirkirinan neqedin, emê hîn zêdetir mezin bibin."

'Em naqedin'

Aliye Yuksel jî anî ziman ku xendek ji bo parastina gel hatine kolan û wiha berdewam kir: "Ji bo ku kuştin û girtin çênebin xendek hatine kolan. Mirov di nava kolanan tên qetilkirin, malên wan tên bombakirin. Gelo ma kes van nabînin? Gelo ma tirk nabêje sedema van çiye? Çima ev qirkirin tên kirin? Malek min a bi pirketan hatî çêkirin heye ew jî şewitandin. Welatê xwe dike beheş û welatê me jî vedigerîne cehnemê. Em pirin ticarî naqedin. Bi sedan dewlet ser vê axê re derbasbûn. Lê hîna em li vêderê ne. Em hîna li ser axa xwe ne. Despêkê suryanî, paşê ermenî û elewî. Niha jî kurdan qetildikin. Lê em naqedin. Gelo yên vê dikin nabêje dê Erdogan mire ev êş hemû dê di situyê me de bimîne. Ez berxwedêrên me silav dikim. Bila xuda li gel wan be."

'Jinên berxwedê hedef digirin'

Merdiye Kaya jî berxwedana li Kurdistanê berdewam dike silav kir û got: "Difikirin ku dema bikevin Botanê dê Botan bikeve. Botan cihek gelek cudaye. Jinên Botanê gelek fedekarin. Di rêya berxwedanê de deh zarokên xwe feda dikin. Kes weke jinên kurd nîne. Tiştek nikare xwe li hember vîna jinên kurd bigire. Ev berxwedan ser milê jinên kurd berdewam dike. Ez di wê baweriyê deme ku dê jinên berxwedêr biserkevin. Em hewildidin li Îzmîrê ji bo wan bibin dengek. Li deverên qedexeya derketina kolanan lê berdewam dike her dem jin hedef tên girtin û tên qetilkirin. Ev jî dide diyarkirin ku jin ji mêran zêdetir li pêşin û hêrsa wan hîn zêdetire. Li kolanan gazê li zarokên me dike, zarokên me jî bersiva wan bi keviran didin. Ev jî berê wan ê berxwedanê ye."

(zt)