Filiz Zeyrek/JINHA

EDENE - Parêzera İHD'a Çukurova Yasemîn Dora Şeker diyar kir ku li Tirkiyê û bi taybet li bajarê Kurdistanê binpêkirina mafê mirovan di sala 2015'an de asta reqorê de ye û destnîşan kir ku, ji ber pêk hatina şer bi taybet wê pêşeroja zarokan bandor bibe.

Parêzera İHD'a Çukurova Yasemîn Dora Şeker derbarê binpêkirina mafê mirovan de yê ku li Tirkiyê pêk tê nirxand. Yasemîn da zanîn ku di sala 2015'an de li Tirkiyê binpêkirina mafê mirovan li gorî salên din zêdebûye û got ku bi taybet li bajarên Kurdan derketiye asta herî bilind. Yasemîn bilêvkir ku gelê Kurd rastî kiryarên ji salên 90'î girantir tên û wiha domand: "Di şert û mercên şer de mirov hem di warê aborî hem jî di warê civakî de gelek bandor dibin. Yê herî bi êş jî taxrîbatên ku ji ber êrîşan pêk tê ye. Bi taybet rewşên şer travmeyek mezin li ser jin û zarokan dide jiyandin. Şer herî zêde pêşeroja zarokan bandor dike."

'Em dizanin dewlet xendek dike hincet'

Yasemîn Cemîle Çagirga (10) di dema dorpêça 9 roja yê Cizîrê de hatî qetilkirin bibîr xist û wiha pêde çû: "Bedena Cemîle yê biçûk ku bi rojan di sarincê de hatî girtin me hemû dît. Dayîka wê ji bo cenaze bêhn nede bi rojan neçar ma di sarincê de bigre. Binpêkirina mafan ên ku li bajarê Kurdistanê pêk tên em bi xendekan ve girênadin. Em dizanin dewlet xendek dike hincet. Binpêkirina mafê mirovan yê herî zêde li Cizîrê pêk hat, me her kes dît û zêde jî dibe. Dîmenên ku me ji Cizîrê dît dijî, kiryarên dijî mirovahiyê pêk hatî û teqez ev yek nayê qebûl kirin. Zarokê 35 rojî di hemêza dayîka xwede hat qetilkirin. Pîrê 75 salî yê ku dema diçû nan bistîne hat qetilkirin, ev yek êşên mezinin."

'Li hember êrîşan gel neçar dimîne parastina xwe yê cewherî pêk bîne'

Yasemîn hevdîtinên ku bi Qaymaqam û saziyên li Cizîrê re pêk anîbû jî raghand û wiha got, "Rayedarên dewletê destûr nadin gel xwe rêvebibe. Hem dibe asteng û hem jî komkujiyan pêk tîne. Malê welatiyan her roj ji aliyê tîmên taybet ve tên serde girtin. Mirov tên binçavkirin û rastî îşkenceyên giran tên. Dewlet bi vî aweyî dixwaze desthilatdariya xwe bide rûnişkandin. Gel jî bi aweyek xwezayî dê parastina xwe yê cewherî li hember van êrîşan pêk bîne. Lê dewlet gelê ku xwe li hember êrîşan xwe diparêze bi pêkanîna îşkencê û komkujiyan hewldide desthilatdariya xwe bide rûnişkandin."

'Em ê komkujiyan qebûl nekin'

Yasemîn derbarê qetilkirina Serokê Baroya Amedê Tahîr Elçî de jî van hevokan li gotina xwe zêde kir, "Me heval û hempîşeyê xwe Tahîr Elçî di nava hawira şerde wenda kir. Tahîr Elçî qasidê aştiyê bû. Di tevahî çalakiyên ku tevlî dibû de behsa aramiya welat dikir û ji bo aştiyê diaxivî. Lê mixabin hêzên tarî reng û dengê aştiyê nepejrandin û xwestin vê dengê bibirin. Hem qetilkirina Tahîr Elçî û hem jî qetilkirina sivîlan em ê tu caran nepejrînin. Ji bo ronîkirina bûyerên tarî tiştê ji dest me tê em ê pêk bînin. Li gel hemû mijarên ku me qalê kir binpêkirina mafê zarokan jî li pêşe. Qedexe tên îlan kirin û gel di malan de digrin, berpirsê vê yê ku fermanê dide ye. Em ê li hember binpêkirina mafê mirovahiyê têbikoşin."

(rc)