Filiz Zeyrek/JINHA

EDENE - Li Taxa Daglioglu ya navçeya Seyhana Edeneyê palîsan bi wesayîta zirxî da ser zarokê 16 salî B. S perçiqandin paşê jî girtin binçavan. Hat zanîn ku zarok dibin çavan de, li qereqol, emniyet û girtîgehê rastî îskenceyên giran hatiye. Ji ber îskenceya B. S dîtiye li ser laşê wî gelek cihê derban heye li gel wê jî tedawî nakin, ji bo wê jî malbatê û parêzerê wî nerazîbûn nîşan dan.

Li gorî daneyên Însiyatîfa Bir Goz De Sen Ol di nava 5 mehan de hêzên dewletê 44 zarok qetilkirin. Zarokên weke B. S yên qetilnekirine jî îskenceyên giran lê kirine. Ji bo êrîşên ser Bakurê Kurdistanê berdewam dikin di 21'ê kanûnê de li Taxa Daglioglu ya navçeya Seyhana Edeneyê çalakiyên protestiyî hatin lidarxistin. Zarokê bi navê B. S birîndar girtin binçavan. Zarokê bi navê B. S yê ku polîsan bi wesayîtên zirxî dayîn ser û perçiqandî niha li girtîgehê tê girtin. Zarok bi rêya malbat û parêzerê xwe diyar kir ku berî girtinê polîsan bi wesayîta zirxî dane ser wî, ew perçiqandin û paşê jî girtin. Her wiha zarok bilêv kir ku li Qereqola Daglioglu, emniyet û girtîgehê îskenceyên giran li wî kirin.

Parêzer: Ser bedena wî gelek şopên derban hene

Parêzera B.S Tugay Bek destnîşan kir ku B. S piştî îfadeya emniyetê derxistin dozgeriyê li wê girtin, dema ku birin Girtîgeha Kurkçulerê li wê jî rastî şideta gardiyanan hat û wiha domand: "Li taxê, qereqolê, enmiyetê û girtîgehê B. S îskence dîtiye. Lingê zarok şikestiye, ser bedena wî gelek şopên îskencê hene û ew hatiye perçiqandin. Di dawiyê de dema min li gel hevdîtin kir jî hîna ti tedawî nedîbiye. Divê demek ji ya din zutir tedawiyê bibîne."

'Serê zarokê me şikandine'

Dayîka B. S Şaide Savci ya 42 salî jî ev agahî dan: "Di binçavan de serê zaroka min şikandine. Ser bedena zaroka min gelek cihên ji ber derban reş û belek hene. Ev wijdanek çawaye. Li hember zarokekê evqas kîn komkirine û êrîş kirine. Ev çî ji me û zarokên me dixwazin. Dê bi zarokên me îskencekirinê bêhna xwe vekin. Di salên 90'an de îskence li me kirin ji ber tindiya wan em neçarî koçberiyê bûn, hîna ew polîtîka berdewam dikin. Weke ku ewqas tindî û îskence besnebûne, niha jî dest bi polîtîkayên qirkirinê kirine. Niha vekirî van polîtîkayayan pêşdixin. Ji bo ku kurdan teslîm bigirin van dikin. Lê ji dîrokê heya niha kurdan li hemberî wan serî ne tewandine û dê serî netewînin jî."

'Li her derê îskece kirine'

Şaide bilêv kir ku bi salane gotina aştiyê ji ser zimanê wan neketiye û wiha berdewam kir: "Bese êdî hunê heya kengê vê zilma xwe bidomînin, heya kengê hunê xwînê birêjin, heya kengê dê mirin bên jiyan kirin êdî bese? Me kurdan her dem got aştî, lê mixabin aştî û aramî qet jî nebû. Lê wan jî bi qirkirinan nekarîn me biqedînin. Em êdî ji van îskence û qirkirinan re dibêjin bese. Li nava taxê, qereqolê, emniyetê û girtîgehê zaroka min îskence kirine. Li her devera birinê îskenece kirine. Heya kengê dê me bikujin, îskence bikin em naqedin û serî natewînin."

(zt)